'Olic 72 - 阿美語聖經-新約附詩篇箴言

O Saki Hongti a Pitolon

O 'olic ni Solomon.

¹ Kawasaw, nanay pakafana'en Iso ko hongti a papido^do to mo^cel Iso, nanay paflien Iso cingra to mo^celay a dmak Iso.

² Ta o mo^celay ko pikowan ningra to finawlan Iso, caay pisakakinih to masamsamay a pakosiya a tamdaw.

³ Nanay marihaked a rihaday ko polong no kitakit, nanay o mo^celay ko dmak i polong no finawlan.

⁴ Nanay o malalenay ko pidipot no hongti to pakosiya a tamdaw, nanay padangen ningra ko cango'otay awaay ko palawinaan a tamdaw, nanay sti'en ningra koya misamsamay i cangraan a tamdaw.

⁵ Ano patdiho ko cidal, ano malikatho ko folad i, nanay mida'oc ko finawlan Iso a mita'ong i Tisowanan.

⁶ Nanay matiya o nika tfad no 'orad i palapalaan ato pisnger no 'o'ol to sra ko dmak no hongti.

⁷ Nanay matnak ko mo^celay yo malahongtiho cingra, nanay yo iraho a malikat ko folad i, malmed a rihaday ko finawlan.

⁸ O mamacowat ko nikowanan ningra a kitakit nai tini tonini a riyar tangasa i iti:raw a riyar, nai Iofratis a 'alo tangasa i tolas no sra.

⁹ O mamipitosor a mita'ong i ka'ayaw ningra ko maro'ay i kohkohan a finawlan, o mamihinefa ko 'ada ningra a mita'ong i cingraan.

¹⁰ O mamipacakat to sakangodo ko hongti no Sipaniya ato hongti no kasakanatal i cingraan, o mamipafli to sakangodo ko hongti no Sipa ato Spa i cingraan.

¹¹ O mamita'ong i ka'ayaw ningra ko hongtingti a ma^min, o mamatayal to saki cingraan ko kasakitakit.

¹² Nawhani yo mitahidang a milongoc ko pakosiya a tamdaw i, padamaen Ningra ko awaay ko palawinaan a tamdaw.

¹³ Adayay Cingra to tadancaay ato pakosiya a tamdaw, pa'oripen Ningra ko 'orip no pakosiya a tamdaw.

¹⁴ Pa'oripen Ningra cangra a paliyas nai misamsamay ato miforiforay, nawhani tadamaan ko pinengneng Ningra to 'orip nangra.

¹⁵ Nanay mida'oc ko hongti. Nanay malayap ningra ko tada^kim no Sipa, nanay mararid a ira ko mitolonay to saki cingraan, nanay mararid a mapakalmed no Kawas cingra.

¹⁶ Nanay kadofah ko kinaira no sra to panay, nanay maldef ko pinaloma i taporoporo, nanay matiya o kinaira no Lipanon ko nika kadofah, nanay matiya o nika lnak no talod i palapalaan ko nika lnak no tamdaw no niyaro'.

¹⁷ Nanay tahada'oc ko ngangan ningra, nanay matiya o pida'oc no cidal ko nika pida'oc no ngangan ningra, nanay pakayni i cingraan ko sakalmed no kalofinawlan, nanay o malmeday cingra wahan no kasakitakit.

¹⁸ O papahmeken ko Tapang, o Kawas no Israil, deng Cingra a ccay ko milahciay to kafahka'an a dmak.

¹⁹ Tahada'ocen a pahmek ko tadamaanay a ngangan Ningra, nanay maldef i hkal ko nika tadamaan Ningra. Amin! Amin!

²⁰ Mapahrekto ko pitolon ni Tafiti o wawa ni Yisi.