'Olic 71 - 阿美語聖經-新約附詩篇箴言

O Pitolon no Mato'asay

¹ Tapangaw, milongoc kako to pipa'ading Iso i takowanan, nanay caay pakatoleden Iso kako.

² O mo^celay Kiso, nanay padamaen, pa'oripenho kako! Nanay tngilenho Iso ko pitolon ako, pa'oripen kako!

³ Nanay o pilimekan a 'ongcoy ako Kiso a malamidipotay i takowanan a tanektekay a pisitaraan, nawhani o pilimekan a 'ongcoy ako Kiso, o pisitaraan ako Kiso.

⁴ Kawasaw ako, pa'oripen kako a paliyas nai tatiihay a tamdaw, ta maliyas ako ko 'icel no mari'angay tatiihay a tamdaw.

⁵ O Isatakaraway a Tapangaw, Kiso ko pafaloco'an ako, nano ka^manganho ako a miti'er i Tisowanan.

⁶ O Kiso ko parihadayay i takowanan nai tiyad no ina ako a hofocen, saka, o 'orip ako a ma^min i, o miti'eray i Tisowanan. O mamida'oc kako a pahmek i Tisowanan.

⁷ Talacowa o kahinapecan no 'alomanay ko 'orip ako, nikawrira, o tanektekay a piki'adingan ako Kiso.

⁸ Saromi'ad sa kako a pahmek i Tisowanan, mipalosiyang kako to nika tadamaan Iso.

⁹ Ano mato'ato'as kako i, nanay caay liyasen Iso kako, ano tadancanca kako i, nanay caay falahen Iso kako.

¹⁰ Misahalaka ko 'ada ako to sapikari'angaw a mipatay i takowanan.

¹¹ Sowal sa cangra, <> saan.

¹² Kawasaw, nanay caay piliyas Kiso i takowanan, Kawasaw ako, nanay kalamkamen Iso a mipadama kako.

¹³ Mamana malowid a matkop koya milooday i takowanan, mamana mapakangodo koya sapiri'angananay i takowanan.

¹⁴ Nikawrira, Kiso ko pafaloco'an ako to romi'ami'ad, saka, matongal a matongal ko pipahmek ako i Tisowanan.

¹⁵ O papasowal kako to nika mo^cel Iso, ano caacaayho ka tadafana' kako to polong no dmak Iso a mipa'orip i, o mamararid kako to romi'ad to dadaya a pasowal to pipa'orip Iso.

¹⁶ O Isatakaraway a Tapangaw, o papahmek kako to tadamaanay a 'icel Iso, deng o nika mo^cel Iso ko papalosiyangen ako.

¹⁷ Kawasaw, nano ka^mangan ako a mapakafana' Iso kako, saka, tahanini kako a mipalosiyang to kafahka'an a dmak Iso.

¹⁸ Kawasaw, ano mato'ato'as kako a ma'ofad i, nanay caay ka falahen Iso kako. Ano palosiyang kako i tlotloc to pakayniay i sakowan a 'icel ato tadamaanay a 'icel Iso i, nanay mikapot Kiso i takowanan.

¹⁹ Kawasaw, tangasato i kakarayan ko nika mo^cel Iso, malahciayto Iso ko tadamaanay a dmak, awaay ko mikikakaay i Tisowanan.

²⁰ Kiso ko papilifetay i takowanan to adihayay a pades ato semsem, nikawrira, palololen Iso a patanektek ko tireng ako, Kiso ko saka^ca ka picomod ako i tadem.

²¹ Kiso ko saka ikakato no i 'ayaway ko nika tanektek ako, o tatayni Kiso a miliyaw a mihinom i takowanan.

²² Kawasaw ako, o mamidatok kako a pahmek to nika so'lin Iso, o Fangcalay a Kawas no Israil, o mamidatok kako a pahmek i Tisowanan.

²³ Ano pahmek kako i Tisowanan i, o mamilkal kako a misatata'ang to ngiha' a romadiw, nawhani o pa'oripay Kiso i takowanan.

²⁴ O mamisaromi'ad kako a pasowal to nika mo^cel Iso, nawhani oya sapikari'angananay i takowanan i, matfadto a mapakangodo.