'Olic 7 - 阿美語聖經-新約附詩篇箴言

O Pilongoc to Sakamo^cel

O 'olic ni Tafiti to saki Tapang a radiw, yo looden ni Kus o Pinyamin a tamdaw.

¹ Tapang a Kawas ako, o pilimekan ako Kiso. Pa'oripen kako a paliyas nai milaopay a milpel i takowanan a tamdaw.

² Aka samatiyaen o pirpet no layon i takowanan, wa macinasen nangra kako, awaay ko mama^deng a tamdaw a pa'orip i takowanan.

³ Tapang a Kawas ako, ano ira ko maan a caay ka mo^cel a dmak ako i, macngel no raraw ko kamay ako,

⁴ ano o tatiihay ko sapaco'ay ako to nga'ayay a dmak no widang ako, ano pakoniraen ako koya padteng sanay a mikari'ang i takowanan a 'ada i,

⁵ papilpelen ko 'ada i takowanan a papirpet, papisakasaken cangra i takowanan a mipatay, ta mapatay kako i sra.

⁶ Tapangaw, kalomowad a mikakter to 'ada ako a milood. Nanay kalomowadho a mipadama i takowanan, Nawhani o mo^celay ko nilongocan Iso.

⁷ Pasa'opoen ko kasafinawlan i taliyok Iso. Nanay i satakaraway a kamaro'an Kiso a mikowan i cangraan.

⁸ Tapangaw, Kiso ko misawkitay to polong no tamdaw, Tapangaw, nanay pahapinangen Iso a misawkit ko nika awa no raraw ako, nawhani awaay ko raraw ako.

⁹ O mo^celay a Kawas Kiso, o mafana'ay a mihapinang to faloco' ato harateng no tamdaw. Saka, nanay 'meten Iso ko tatiihay a dmak no tatiihay a tamdaw. Pakaolahen ko nga'ayay ko dmak a tamdaw.

¹⁰ O midipotay i takowanan a sapatada ko Kawas, Pa'oripen Ningra ko mo^celay a tamdaw.

¹¹ O mo^celay a misawkitay ko Kawas, Mararid Cingra a makter to tatiihay a tamdaw.

¹² Ano caay pifalic to faloco' ko tamdaw i, cadiwen no Kawas ko fonos Ningra a mitalem. Misa'imer Cingra to sapipana'aw.

¹³ Mapatalato Ningra ko sapipatay to tamdaw a sapilood, o papa^feren Ningra ko cinamalay a pana'.

¹⁴ Misahalaka to tatiihay a dmak ko tatiihay a tamdaw, misanga' cingra to sakarawraw, mananam cingra a misa'fit.

¹⁵ Karkaren ningra ko sra a misarfong to katfadan no tao, 'arawhani, cingra ko matfaday itira.

¹⁶ Ora tatiihay a dmak ningra ko mitfocay i cingraan, ora piforifor ningra to tamdaw ko midoka'ay i cingraan.

¹⁷ Pakayni i mo^cel no Tapang saka mikansiya kako, o papahmeken ako a palosiyang ko nika tadamaan no ngangan no Isatakaraway a Tapang.