'Olic 69 - 阿美語聖經-新約附詩篇箴言

O Pitahidang a Milongoc to Pipadama

O 'olic ni Tafiti. Mapatorod i kakridan no paradiway. O no <> a hacong ko saparadiw.

¹ Kawasaw, nanay pa'oripenho kako! Nawhani ma'alolto no nanom kako a mada'at.

² Talahnot kako, awaay ko pasaripa'an ako, matneng kako i talolongay a nanom, matahpo no cdas kako.

³ Malotayto kako to picli'an ako a mitahidang to papa'orip, marihawto a ma'icang ko takolaw ako, kadipohaw sato ko mata ako to nano pitala ako to pipadama Iso.

⁴ Ikaka no nika adihay no fokes ako ko nika 'aloman no padteng sanay a mi'intel i takowanan, ci'icel koya padteng sanay a misa'ada i takowanan, oya sapipatayananay i takowanan a tamdaw. Caay pitakaw kako i, pasadaken koya nitakawan iso a dafong, saan cangra.

⁵ Kawasaw, mafana' Kiso to nika apa ako, awaay ko nisimedan ako a raraw i ka'ayaw Iso.

⁶ O Isatakaraway a mikomoday a Tapang. Nanay caay ka mapakangodo ako ko miti'eray i Tisowanan. Kawasaw no Israil, nanay caay ka mapakalikaf ako ko mita'ongay i Tisowanan.

⁷ O nano pitoor ako i Tisowanan ko sakalikaf ako, mapakangodo kako to pitongangan no tao.

⁸ Pakotao sato ko salikaka ako i takowanan, pakolafang sato ko paro no loma' ako i takowanan.

⁹ Matiya o malikatay a namal ko nika rafraf no faloco' ako a malalok to saki Fangcalay Pita'ongan Iso, saka, tayni i takowanan ko pilikaf no tao i Tisowanan.

¹⁰ Pakaynien ako i pisaliway ko pi'emet to tireng i, likafen nangra kako,

¹¹ ciriko' kako to sakararom a mowa a riko' i, katawaen nangra kako.

¹² Kalasasowalen han nangra kako i lalalalan, halomalasangay a kararadiw han nangra a milokes kako.

¹³ Nikawrira, Tapangaw, kako to no mako i, pasayra kako i Tisowanan a mitolon, Kawasaw, tona o mida'ocay a tadamaan ko olah Iso, tona miktonto Kiso to sowal to sapa'oripaw i tamiyanan saka, nanay do^doen Iso ko nipatonekan Iso a romi'ad a paca'of i takowanan.

¹⁴ Nanay pa'oripenho Iso kako a pasadak nai hnot, ta caay ka lneng kako, nanay pa'oripenho kako a paliyas nai 'ada ato talolongay a nanom.

¹⁵ Nanay caay ka 'alol no cdas kako, aka papi'alolen ko talolongay a nanom i takowanan, aka haydaen ko nika tadem ako i laloma' no tadem.

¹⁶ Tapangaw, nanay paca'ofenho Iso kako, nawhani o nga'ayay ko sini'ada Iso, nanay sikolenho kako a mido^do ko tadamaanay a sini'ada Iso.

¹⁷ Nanay caay pisorikol Kiso a misatalifokil to matayalay Iso, mapadesay kako i matini, nanay kalamkamen a mipaca'of kako.

¹⁸ Nanay tayni Kiso a mipa'orip i takowanan, nanay alaen Iso kako nai kamay no 'ada.

¹⁹ Mafana' Kiso to nika samsam ato nika lokes ako, mafana' Kiso to 'ada ako a ma^min.

²⁰ Mapelpel ko faloco' ako to nano pilokes no tao saka, matoled kako. Mitala kako to sasida'it i takowanan, nikawrira, awaay aca, hinatala kako to mamihinom i takowanan, 'arawhani awaay aca.

²¹ Yo macahiw kako i, o sawarak ko sapakaen nangra i takowanan, yo maso'aw kako i, o 'acicimay ko sapananom nangra i takowanan.

²² Mamana o sakatkop nangra ko tadamaanay a tahka nangra, mamana o sakatfad nangra ko nika acang nangra.

²³ Mamana mapohaw ko mata nangra, ta caayto paka'araw. Mamana mararid a adada ko tatlecan nangra.

²⁴ Mamana taktaken Iso i cangraan ko kter Iso, mamana matakop no kter Iso cangra.

²⁵ Mamana malanalacolan koya kamaro'an nangra, mamana awato ko maro'ay a tamdaw i kopang nangra.

²⁶ Nawhani kari'angen nangra ko nisti'an Iso a tamdaw, katawaen nangra a milikaf ko nidoka'an Iso a tamdaw.

²⁷ Mamana tongalen Iso ko pitfoc i cangraan, ta caay ka rapot cangra a mapa'orip Iso.

²⁸ Mamana padengen Iso ko ngangan nangra i pitilidan to ngangan no ma'oripay, mamana caay ka tilid ko ngangan nangra i pitilidan to ngangan no mo^celay a tamdaw.

²⁹ Nikawrira, mapades, misemsem kako, Kawasaw, nanay dipoten kako, pa'oripen kako.

³⁰ O papahmek kako a pa'olic a romadiw to ngangan no Kawas, o mamikansiya kako a mipalosiyang to nika tadamaan Ningra.

³¹ Ikaka no nika olah no Tapang to nipacakatan a okang a kolong, ano ^ca o cisakicohay ciwa'aay a tofor a kolong ko nika olah Ningra to pikansiya ako.

³² O lalipahak ko masamsamay a tamdaw a pakanengneng tonini, o mamapa'icel ko faloco' no mita'ongay to Kawas a tamdaw.

³³ Mitngil ko Tapang to pitolon no misemsemay a tamdaw, caay ka tawal Ningra ko marofoay a finawlan Ningra.

³⁴ Nanay mipahmek to Kawas ko i kakarayanay ato i hkalay a ma^min, nanay mipahmek i Cingraan ko riyar ato i laloma'ay nira a ma^min.

³⁵ O papa'oripen no Kawas ko Cion, o laliyawen Ningra a patireng ko Yuta a niyaro', o cacisra ko finawlan Ningra itira a maro'.

³⁶ O mamirocok ko tloc no matayalay Ningra tora sra, o a itira a maro' ko maolahay Cingraan a tamdaw.