'Olic 63 - 阿美語聖經-新約附詩篇箴言

Ma'ilol to Kawas

O nitilidan ni Tafiti a 'olic, yo itira cingra i kohkohan no Yuta.

¹ Kawasaw, o Kawas ako Kiso, sa'icel sa kako a milongoc i Tisowanan, matiya o makdalay a awaay ko nanom a omah kako, tadama'ilol kako i Tisowanan.

² Na mapanengnengayto Iso kako to Fangcalay a Kaitiraan Iso, manengnengayto ako ko tadamaanay a 'icel ato 'dil Iso.

³ Nawhani ikaka no 'orip ko nika tadamaan no mida'ocay a olah Iso, saka, o papahmek kako i Tisowanan.

⁴ O kakansiyaen ako Kiso tangasa i tolas no 'orip ako, pasayra kako i Tisowanan a pakamay a mitolon.

⁵ O mamafcol a mitahka ko salo'afang ako, o raromadiw kako a lipahak a pahmek i Tisowanan.

⁶ Yo mati'nang kako i kafoti'an i, maharateng ako Kiso, salafii sa kako a miharateng i Tisowanan.

⁷ Nawhani mararid Kiso a mipadama i takowanan, i laloma' no sapikpik Iso kako a lipahak a romadiw.

⁸ Ketket sa ko faloco' ako a mitoor i Tisowanan, midama ko kawanan a kamay Iso i takowanan.

⁹ Nikawrira, oya sapipatayananay i takowanan a tamdaw i, o tatayra a ma^min i kaitiraan no mapatayay.

¹⁰ O mamapatay no fonos cangra, o mamakaen no waco no pala ko kodih nangra.

¹¹ Nikawrira, o mamapalipahak no Kawas ko hongti. O miktonay to sowal i ka'ayaw no Kawas i, o papahmek a ma^min i Cingraan, nikawrira, o mamatoem ko ngoyos no misamangahay a tamdaw.