'Olic 62 - 阿美語聖經-新約附詩篇箴言

O Piti'er to Kawas

O 'olic ni Tafiti. Mapatorod i kakridan no paradiway ci Yitutun.

¹ Sapater sa kako a mitala to Kawas, o nai Cingraan ko pa'oripay i takowanan.

² Deng Cingra o 'ongcoy ako, o pa'oripay i takowanan, o pa'adingay Cingra i takowanan saka, caayto ko mamalowid kako.

³ Tahacowa ko pikari'ang namo a ma^min to ccay a tamdaw saw? Matiyato o sakaloyohananay a 'adipel cingra a o mamaloyohto.

⁴ Masarocod ko faloco' namo a sapitfadan i cingraan, maolah kamo a misamangah. O ngoyos aca namo ko mipalmeday a somowal, 'arawhani o mi'kakay i cingraan ko faloco' namo.

⁵ Sapater sa kako a mitala to Kawas, deng Cingra a ccay ko pafaloco'an ako.

⁶ Deng Cingra o 'ongcoy ako, o pa'oripay i takowanan, Cingra ko pa'adingay i takowanan saka, caayto ko mamatfad kako.

⁷ O nano Kawas a ma^min ko sakamapa'orip ato sakatadamaan ako, o pilimekan ako ato tanektekay a 'ongcoy ako Cingra.

⁸ Kamo o finawlan ako, kararid a miti'er to Kawas, patalahkalen i Cingraan ko i faloco'ay namo, nawhani o piki'adingan ita Cingra.

⁹ Matiya o fali ko tamdaw, ano o tadamaanayto, ano o sasafaayto a tamdaw i, awaay ko ^poc. Ano dadoyen cangra i, awaay ko karetereteng nangra, i safaayho no fali ko nika kahmaw nangra.

¹⁰ Aka piti'er kamo to 'icel no miforiforay, aka pisafaloco' to sakacidafongaw to nitakawan, ano matongatongal ko dafong namo i, aka piti'er torira.

¹¹ Kinapinapi:nato kako a pakatngil to sowal no Kawas, o sakowan a 'icel i, o no Mako saan.

¹² Ira ko caay ka falic a olah Ningra. Tapangaw, pakaynien Iso i dmak no kahaccaccay a tamdaw ko pipakaolah i cingraan.