'Olic 61 - 阿美語聖經-新約附詩篇箴言

O Pilongoc to Sadipot

O 'olic ni Tafiti. Mapatorod i kakridan no paradiway.

¹ Kawasaw, nanay tngilen Iso ko pitahidang ako a milongoc, nanay tngilen Iso ko pitolon ako.

² I tini kako iraay no loma' a pala, mararom ko faloco' ako, saka, pasayra kako i Tisowanan a milongoc. Nanay kriden Iso kako a patayra i ikarihadayan a pilimekan,

³ nawhani o midipotay i takowan Kiso, o pipacolian ako to 'ada a pisitaraan Kiso.

⁴ Nanay papida'ocen kako a pakamaro' i talo'an Iso, papilimeken kako i laloma' no sapikpik Iso.

⁵ Kawasaw, matngilto Iso ko niktonan ako a sowal, mapaflito Iso kako to sra, oya lalayapen no mangodoay Tisowanan.

⁶ Nanay sofacen Iso ko 'orip no hongti, ta tahada'oc ko 'orip ningra.

⁷ Kawasaw, nanay mida'oc ko pikowan ningra i ka'ayaw Iso, nanay o caay ka falic a olah ato so'linay Iso ko sapidipot i cingraan.

⁸ Ta mida'oc kako a romadiw a pahmek to ngangan Iso, lahcien ako to romi'ami'ad ko niktonan ako a sowal a mipacakat i Tisowanan.