'Olic 6 - 阿美語聖經-新約附詩篇箴言

O Pilongoc to Pipadama i Kapadesan

O 'olic ni Tafiti. Mapatorod i kakridan no paradiway, o faloay a kliw a sapisotasot a lalosidan ko sapacafay a pasoni. O no <> a hacong ko saparadiw.

¹ Tapangaw, milongoc kako i Tisowanan, aka kakteren kako. Aka ka o nano kter Iso ko sapitfoc i takowanan.

² Tapangaw, nanay kaadayayen Iso kako, nawhani o tadancaay kako. Tapangaw, adahen kako, nawhani awaayto ko 'ice'icel ako.

³ Matfad i kapadesan ko tireng ato faloco' ako. Tapangaw, tahacowa ko nika halafin no pades ako saw?

⁴ Sikolenho kako a mitdal to faloco' ako Tapang. Nawhani o maolahay Kiso i takowanan. Saka, nanay pa'oripen kako.

⁵ Itira i kaitiraan no mapatayay i, awaay ko miharatengay i Tisowanan. Itira i tadem i, awaay ko mahmekay i Tisowanan.

⁶ Maroray kako to nano rarom ako a tomangic. Snger sato ko kafoti'an ato tatangalan ako to losa' ako to dadayadaya.

⁷ Mararid ko tangic ako saka, mapato' ko mata ako. Kadipohaw sato ko mata ako. O nano 'ada ko sakamatini ako.

⁸ Kamo o tatiihay a tamdaw, piliyas i takowanan. Nawhani matngilto no Tapang ko tangic ako.

⁹ Mitngil ko Tapang to pitahidang ako a milongoc, Milayap ko Tapang to pitolon ako.

¹⁰ O mamapakangodo ko 'ada ako a malowid, Wa talifahal sa cangra a maparawraw a milaliw.