'Olic 59 - 阿美語聖經-新約附詩篇箴言

O Pilongoc to Sadipot

O nito^to'an ni Tafiti a 'olic, yo ocoren ni Sawlo ko tamdaw a midipdip to loma' ni Tafiti to sapipatayaw cingraan. Mapatorod i kakridan no paradiway. O no <> a hacong ko saparadiw.

¹ Kawasaw ako, nanay paliyasen kako nai 'ada ako, dipoten kako a paliyas nai mari'angay i takowanan.

² Nanay pa'oripen kako a paliyas nai tatiihay a tamdaw, ta maliyas ako ko mipatayay a tamdaw.

³ Nengnengen, misa'imer cangra to sapikari'angaw i takowanan, masakapot ko miforiforay a tamdaw a pacoli i takowanan, caay ko nano patlac ako konini, caay haca ko nano pidmak ako to maan a tatiihay a dmak.

⁴ Tapangaw, awaay ko patlac ako i, tamor sa cangra to sapikari'angaw i takowanan.

⁵ Tapangaw, o mikomoday a Kawas, kalomowad a padama i takowanan! O Kawas no Israil, nanay tapalen kami! Mamana lomowad Kiso a mitfoc to roma a finacadan, aka ka sini'adaen cangra o tatiihay o pacoliay a tamdaw.

⁶ Minokay cangra to dadaya i, matiya o miltohay a waco cangra a misarakarakat to niyaro'.

⁷ O katalawan a mitngil ko pisamsam nangra a mipatalaw, matiya o fonos ko sowal nangra, ira a mimaan ko mitngilay to sowal ita saan cangra.

⁸ Nikawrira, Tapangaw, matawa Kiso i cangraan, lokesen Iso ko kasakitakit.

⁹ 'Icelaw ako, mica'ngaw kako i Tisowanan, Kawasaw, o pilimekan ako Kiso.

¹⁰ Maolah ko Kawas ako i takowanan, tayni Cingra a mipadama i takowanan, pa'arawen Ningra kako to nika lowid no 'ada ako.

¹¹ Kawasaw, aka hadefeken Iso a mipatay cangra, ta caay katawal no finawlan ako Kiso. Tapangaw, o midipotay Kiso i tamiyanan. Mamana pakayni i 'icel Iso a milaplap a mipalasawad i cangraan.

¹² Matomes no tatiihay ko ngoyos nangra, sahto o sakaciraraw ko sowal nangra. Mamana tahafikod cangra a mapolin to nano pisalata'ata'ang nangra. Nawhani o mi'kakay, o misa'fitay cangra,

¹³ mamana pasayra Kiso i cangraan a makter a mitkop i cangraan, mamana ^minen Iso a mitkop cangra. Ta mafana' ko kasafinawlan to nika o mikowanay ko Kawas to Israil ato o mildefay to polong no hkal ko pikowan Ningra.

¹⁴ Minokay ko 'ada ako to dadaya i, matiya o miltohay a waco cangra a misarakarakat to niyaro',

¹⁵ matiya o waco a talacowacowa a mikilim to kakaenen, ano caay ka fcol cangra i, milaltoh cangra.

¹⁶ Nikawrira, o raromadiw kako a pahmek to 'icel Iso, o mamilkal kako a romadiw to dafadafak to mida'ocay a olah Iso. O pilimekan ako Kiso, o midipotay Kiso i kapadesan ako.

¹⁷ Midipotay i takowanan, o papahmeken ako Kiso, o pilimekan ako ko Kawas, o maolahay i takowanan a Kawas.