'Olic 56 - 阿美語聖經-新約附詩篇箴言

O Miti'eray to Kawas a Pitolon

Yo marpet no Filistin a tamdaw ci Tafiti itira i Kat a niyaro'. O nito^to'an ni Tafiti a 'olic, mapatorod i kakridan no paradiway. O no <> a hacong ko saparadiw.

¹ Kawasaw, kaadayayen kako, nawhani makari'ang no tao kako, saromi'ad sa ko 'ada a misamsam takowanan.

² Caay pitolas ko 'ada a mikari'ang i takowanan, sa'aloman sa ko mipacoliay i takowanan.

³ O Isatakaraway a Tapangaw, yo matalaw kako i, miti'er kako i Tisowanan.

⁴ Miti'er kako to Kawas, mipahmek kako to niktonan Ningra a sowal, miti'er kako i Kawas saka, caayto ka talaw kako. Ma^dengho a pakapimaan ko tamdaw i takowanan saw?

⁵ Saromi'ad sa ko 'ada a sapikari'angan i takowanan, mararid cangra a misaharaterateng to sapikari'angaw i takowanan.

⁶ Masakapot cangra a misa'imer, misa'adapaw cangra to sapipatayaw i takowanan.

⁷ Kawasaw, nanay tfocen Iso ko nika ciraraw nangra, nanay kakteren Iso cangra a mipolin.

⁸ Mafana' Kiso to nika adihay no pades ako, maharateng Iso ko nika rowis no losa' ako. Caay ka tilid i cudad Iso konini a ma^min saw?

⁹ Ano mitahidang kako i Tisowanan i, o mamalowid a milaliw ko 'ada ako, onini ko saka, mafana' kako to nika o mipadamaay ko Kawas i takowanan.

¹⁰ Miti'er kako to Kawas, mipahmek kako to niktonan Ningra a sowal, miti'er kako to Tapang, mipahmek kako to niktonan Ningra a sowal.

¹¹ Miti'er kako to Kawas saka, caayto ka talaw kako. Ma^dengho a pakapimaan ko tamdaw i takowanan saw?

¹² Kawasaw, lahcien ako ko niktonan ako a sowal i Tisowanan, mipacakat kako i Tisowanan to sapikansiya a sapato'aya.

¹³ Nawhani, o nipa'oripan Iso kako a paliyas nai patay, saka, caay ka lowid kako, ma'oripho kako i ka'ayaw no Kawas, i laloma' no 'dil no pafliay i takowanan to 'orip.