'Olic 55 - 阿美語聖經-新約附詩篇箴言

O Pitolon a Milongoc to Pipadama

O 'olic ni Tafiti, o sapasifana' a 'olic. Mapatorod i kakridan no paradiway, o sapisotasot a lalosidan ko sapacafay a pasoni.

¹ Kawasaw, nanay tngilenho Iso ko pitolon ako, aka piliyas a caay pikihar to pingitangit ako.

² Nanay tngilenho Iso ko pingitangit ako, paca'ofenho kako, nawhani marorayto kako to nano rawraw no faloco' ako.

³ O sakarawraw ako i, o nano nipipatalaw no 'ada ako ato pikari'ang no tatiihay a tamdaw. Tongalen nangra ko pades ako, kakteren nangra kako a mi'intel.

⁴ Saadada sa ko faloco' ako, mitahpo i takowanan ko pipatalaw no patay.

⁵ Mackok a mamirmir kako, matahpo no talaw kako.

⁶ Nanay ira ko sapikpik ako a matiya o topi, ta ma^deng kako a ma^fer a mikilim to pahanhanan.

⁷ Ta ma^fer kako a tayra i maraayay a kohkohan a milafin itira.

⁸ Ta kalamkam a makilim ako ko pilimekan to miforiforay a faliyos ato 'orad.

⁹ Tapangaw, nanay parawrawen Iso ko caciyaw no 'ada, nawhani ma'araw ako i niyaro' ko miforiforay a miparawraw.

¹⁰ Romakat cangra i tongroh no 'adipel no niyaro' to romi'ad to dadaya a mitaliyok to niyaro', maldef no raraw ato pades ko niyaro'.

¹¹ Ira ko mitiihay i cowacowa no niyaro', sahto o misafana'ay ato misa'fitay ko i niyaro'ay.

¹² Ano o 'ada ako ko mihaenay a milikaf i takowanan i, kona ma^dengho kako a mihadidi, ano o pacoliay i takowanan ko malita'angay a mi^pec i, kona ma^dengho kako a milimek i cingraan.

¹³ 'Arawhani, o kapot ako, o kafana'an ako ato tadawidang ako ko mihaenay i takowanan.

¹⁴ O nano manga'ayay kami a malalicay, o nano malahaklongay kami a tayra i Fangcalay Pita'ongan a mita'ong.

¹⁵ Mamana talifahal sa a mapatay ko 'ada ako, mamana danta' sa ko patay nangra. Nawhani, sahto o tatiihay ko iraay i loma' nangra ato i faloco'ay nangra.

¹⁶ Nikawrira, mitahidang kako a milongoc to pipadama no Kawas i, caay ka ^ca pipa'orip ko Tapang i takowanan.

¹⁷ Ano o dafakto, ano o kalahokanto, ano o dadayato i, mararid kako a pa'ading to rarom no faloco' ako, caay ka ^ca tngilen Ningra.

¹⁸ Ano 'alomaloman ko 'ada a milood i takowanan i, pa'oripen Ningra kako a paliyas nai piloodan a parihaday a panokay.

¹⁹ Caay ka ^ca pitngil to longoc ako konini a nano to'asho a mikowanay a Kawas, o lalowiden Ningra cangra, nawhani caay pifalic cangra to faloco', caay ka ngodo cangra to Kawas.

²⁰ O nano kapot ako i 'ayaw i, pacoli to widang ningra, cicihen ningra ko niktonan ningra a sowal.

²¹ Ikaka no kamleng no pata a simal ko nika kamleng no sowal ningra, 'arawhani, matomes i faloco' ningra ko 'intel. Ikaka no simal ko nika ka^ped no sowal ningra a damsay, 'arawhani, matiya o citalemay a fonos ko nipicocok no sowal ningra.

²² O papatoroden iso i Tapang ko kartengay a 'inorong iso, caay ka ^ca padamaen Ningra kiso, caay pihayda Cingra to nika tfad no mo^celay a tamdaw.

²³ Nikawrira, Kawasaw, o tatfaden Iso i kaitiraan no mapatayay ko misa'fitay a tamdaw, o mamafatad ko 'orip nangra, kako to no mako i, masarocod ko faloco' a miti'er i Tisowanan.