'Olic 5 - 阿美語聖經-新約附詩篇箴言

O Pilongoc to Sadipot

O 'olic ni Tafiti. Mapatorod i kakridan no paradiway, o tipolo a lalosidan ko sapacafay a pasoni.

¹ Tapangaw, tngilenho ko sowal ako. Haratengen ko roray no faloco' ako.

² Hongtiaw ako, Kawasaw ako, tngilen ko pitahidang ako a milongoc to pipadama Iso. Tapangaw, pasayni kako i Tisowanan a milongoc.

³ Matngil Iso ko ngiha' ako to dafadafak, yo masadak ko cidal i, pasayni kako i Tisowanan a milongoc, mitala kako to pipaca'of Iso.

⁴ Caayay ka olah Kiso o Kawas to tatiihay a dmak, caay pihayda Kiso to pikapot no tatiihay a tamdaw a maro'.

⁵ Maacek Kiso to misatakaraway ko faloco' a tamdaw. Mi'intel Kiso to tatiihay ko dmak a tamdaw a ma^min.

⁶ Palasawaden Iso ko misamangahay to sowal. Ka'osien Iso ko mipatayay ato misa'fitay a tamdaw.

⁷ Tona tadamaolah Kiso i takowanan saka, manga'ay kako a micomod i Fangcalay Pita'ongan i Tisowanan. Orasaka, mipitosor kako i Fangcalay Pita'ongan a pasayra i Tisowanan a mita'ong.

⁸ Tapangaw, ira ko 'ada i taliyok ako a misa'imer. Nanay kriden Iso kako i mo^celay a lalan, ta pakado^do kako to nafaloco'an Iso, pahapinangen haca Iso ko malorarakaten ako.

⁹ Caay ka o papaso'linen ko sowal no 'ada ako. O sakapleng no tamdaw ko i faloco'ay nangra. Matiya o mafohatay a tadem ko ngoyos nangra, kameleng ko sma nangra, sahto o misa'fitay ko sowal.

¹⁰ Kawasaw, nanay pasteken cangra i raraw a mitfoc. Nanay o sakatfad nangra ko nisafaloco'an nangra. Nanay fahfahen cangra a paliyas nai Tisowanan. Nawhani adihay ko raraw nangra a pacoli i Tisowanan.

¹¹ Nikawrira, oya miki'adingay i Tisowanan a tamdamdaw i, nanay mararid cangra a lipahak a mahmek a romadiw. Nanay dipoten Iso koya maolahay i Tisowanan. Ta pakayni i Tisowanan ko sakalata'ang nangra a lipahak.

¹² Tapangaw, o mipalmeday Kiso to mo^celay a tamdaw. Matiya o sapatada ko sini'ada Iso a midipot i cangraan.