'Olic 47 - 阿美語聖經-新約附詩篇箴言

O Satadamaanay a Mikowanay

O nitilidan no tloc no ngasaw ni Korah a 'olic. Mapatorod i kakridan no paradiway.

¹ Kamo o polong no finawlan, pipa^pa to kamay a pahmek. Satata'angen ko ngiha' a romadiw a pahmek to Kawas.

² Kangodoen ko Isatakaraway a Tapang, nawhani, o tadamaanay a hongti, o mikowanay to polong no hkal Cingra.

³ Cingra ko sapakalowid ita to kasafinawlan, Cingra ko sakapikowan ita to kasakitakit.

⁴ Pili'en Ningra ko saki titaanan a kamaro'an ita a sra, to malokarahkeran ita a omah o kaolahan Ningra a finawlan.

⁵ I pilkal no finawlan a mapakamaro' ko Kawas i tadamaanay a kamaro'an, i pila^pa no finawlan to wa'a no siri a mapacakat ko Tapang i kamaro'an no hongti.

⁶ Tata, radiwen ita a pahmek ko Kawas. Tata, radiwen ita a pahmek ko hongti ita.

⁷ O hongti no polong no hkal ko Kawas, pa'olicen ita a romadiw a pahmek Cingra.

⁸ Maro' ko Kawas i fangcalay a tadamaanay a kamaro'an, malahongti Cingra a mikowan to kasakitakit.

⁹ Malaccay a masa'opo ko kakridan no kasakitakit a malafinawlan no Kawas ni Apraham. Mala no Kawasto ko polong no sapatada no sofitay no kasakitakit, deng Cingra ko sakakaay i polong no maamaan.