'Olic 44 - 阿美語聖經-新約附詩篇箴言

O Pilongoc to Sadipot

O nitilidan no tloc no ngasaw ni Korah a 'olic, o sapasifana' a 'olic. Mapatorod i kakridan no paradiway.

¹ Kawasaw, matngilto niyam ko nano sowal no tato'asan niyam to pakayniay i tadamaanay a dmak Iso i cangraan i ti:yaho,

² Kiso ko milaplapay to roma a finacadan, paaro'en Iso a palnak ko finawlan Iso i sra nangra, tfocen Iso ko kasafinacadan, nikawrira, palmeden Iso a pacakat ko finawlan Iso.

³ Caay ko fonos ko sapilowid no finawlan Iso to 'ada a miala tora sra, caay ko nano 'icel nangra ko sapakalowid nangra to 'ada, deng o nano patlaw ato 'icel Iso ato pikapot Iso ko sapakalowid nangra, nawhani maolah Kiso i cangraan.

⁴ O hongti ako, o Kawas ako Kiso, Kiso ko sapakalowid no finawlan Iso.

⁵ O nano 'icel Iso ko sapakalowid niyam to 'ada, o nano pikapot Iso i tamiyanan ko saka masakasak niyam ko 'ada.

⁶ Caay piti'er kami to pana' niyam, caay pakapa'orip ko fonos ako i takowanan.

⁷ Nikawrira, lowiden Iso koya mi'intelay i tamiyanan, deng Kiso ko pa'oripay a paliyas nai 'ada niyam.

⁸ Kawasaw, o mamararid kami a pahmek i Tisowanan. O mamida'oc kami a mikansiya i Tisowanan.

⁹ Nikawrira, anini sa i, falahen Iso kami a mipakangodo, caayto pikapot Kiso to sofitay niyam a milood.

¹⁰ Mapakatoled Iso kami i ka'ayaw no 'ada niyam, pakonira han Iso ko mi'intelay a 'ada a papi'afas to dafong niyam.

¹¹ Samatiya han Iso kami o papacoken a siri a paliwasak i roma a kitakit.

¹² Saka^med han Iso ko finawlan Iso a pa'aca, awaay aca ko ha^tan Iso.

¹³ O pihaen Iso i tamiyanan i, malokatawaan, malosasopa'en, malolalokesen no tao kami.

¹⁴ Malokatawaan, malosasamsamen no kasakitakit kami.

¹⁵ Mararid kako a mapakangodo, caay pitolas a malokes kako,

¹⁶ nawhani matngil ako ko ngiha' no milokesay ato misamsamay, ma'araw ako ko misa'adaay ato pacoliay i takowanan.

¹⁷ Talacowa caay ka tawal niyam Kiso, caay piliyang kami to nitlekan Iso a sowal, nikawrira, malitmoh niyam ko matiniay a pades.

¹⁸ So'linay ko dmak niyam to saki Tisowanan, caayho pipacoli kami to limo'ot Iso.

¹⁹ 'Arawhani siday han Iso kami i kaitiraan no 'a'adopen, falah han Iso kami i tatihi no patay.

²⁰ Ano matawalay niyam Kiso o Kawas niyam, ano pasayraay kami a mitolon i kawakawas no roma a kitakit i,

²¹ kona mahapinang Iso a mitapal, nawhani mata'sel ko pinengneng Iso to masimeday i faloco' no tamdaw.

²² Nikawrira, o nano Miso ko saka saromi'ad sa kami, samatiya sa o papacoken a siri kami.

²³ Tapangaw, kapalalto, nawiro fafoti' sa Kiso saw? Kalomowadto, akato tahada'ocen kami a mifalah.

²⁴ Nawiro caay pilingwa Kiso i tamiyanan saw? Nanay haratengenho ko pisemsem niyam ato nika samsam niyam.

²⁵ Matolo' kami i sra, mapolin kami i alafoh no sra.

²⁶ Nanay kalomowadto Kiso a padama i tamiyanan, nawhani o mida'ocay ko olah Iso i tamiyanan, nanay pa'oripenho Iso kami.