'Olic 43 - 阿美語聖經-新約附詩篇箴言

O Pitolon no Mapaliwasakay a Tamdaw (2)

¹ Kawasaw, nanay pasteken Iso kako i awaay ko raraw, pa'adingen kako a paliyas nai caay pitoor Tisowanan, nanay pa'oripen Iso kako a paliyas nai misa'fitay tatiihay a tamdaw.

² O pa'adingay a Kawas ako Kiso, nawiro falahen Iso kako saw? Nawiro mararid kako a makari'ang, mapasemsem no 'ada?

³ Nanay o so'lin ato likat Iso ko sapikrid i takowanan, kriden kako a patayra i fangcalay a lotok Iso i Cion, i kamaro'an Iso a Pita'ongan a loma'.

⁴ Ta tayra kako i ka'ayaw no pipato'ayaan, i ka'ayaw no pafliay i takowanan to mida'ocay a lipahak a Kawas. Kawasaw, Kawas ako, o mamidatok kako a pahmek a romadiw i Tisowanan.

⁵ Nawiro matini ko nika rarom ako? Nawiro matini ko nika toled ako? O sasafaloco'en ako ko Kawas, o laliyawen ako a pahmek Cingra, o pa'oripay a Kawas ako Cingra.