'Olic 37 - 阿美語聖經-新約附詩篇箴言

O 'Orip no Tatiihay ato Nga'ayay a Tamdaw

O 'olic ni Tafiti.

¹ Aka ka roray a miharateng to tatiihay a tamdaw, aka ka 'inal to caay ka mo^cel ko dmak a tamdaw.

² O mamatiya o rngos a kalamkam a ma'icang cangra, o mamatiya o hana a marasras a malasawad cangra.

³ Orasaka, ti'eren ko Tapang, ka o nga'ayay ko dmak, ta marihaday kamo a maro' tonini a sra.

⁴ Pipasayra i Tapang a milongoc to sakalipahak, ta paflien Ningra kiso to kangalayan iso.

⁵ Patoroden i Tapang ko tireng iso, ti'eren Cingra, ta padamaen Ningra kiso.

⁶ O sasamatiyaen Ningra o matdiay a likat ko nika lalen no dmak iso, o sasamatiyaen Ningra o cidal to kalahokan ko nika mo^cel no dmak iso.

⁷ Kasinanot ko faloco' a miti'er to Tapang, kakoda'it ko faloco' a mitala i Cingraan, aka ka roray a miharateng to nika cakat no 'orip no tao, aka ka ngaliwngiw to nika lahci no tatiihay a dmak nangra.

⁸ Aka ka kter, aka ka firang, aka ka roray ko faloco' iso a miharateng, nawhani caay ko sakaci^poc iso o sakatatiih iso konini.

⁹ O miti'eray to Tapang i, o rarihaday ko aro' nangra tonini a sra, nikawrira, o mamalaplap ko tatiihay a tamdaw.

¹⁰ Ccay a mlet, o mamalasawadto ko tatiihay a tamdaw, ano tayra kiso a mikilim i, awaayto a matama iso cangra.

¹¹ Nikawrira, o po^neray ko faloco' a tamdaw i, marihaday ko aro' nangra tonini a sra, o rarihaday cangra a malmed ko 'orip.

¹² Misahalaka ko tatiihay a tamdaw to sapikari'angaw to mo^celay a tamdaw, kelkel sato wadis a matlii cingra.

¹³ Nikawrira, matawa ko Tapang to tatiihay a tamdaw, nawhani mafana' Cingra to nika mangatato ko sakatkopaw nangra.

¹⁴ Mihodoc to fonos, minayat to focol no pana' ko tatiihay a tamdaw to sapikari'angaw to pakosiya ato tadancaay a tamdaw ato sapipatayaw nangra to mo^celay a tamdaw.

¹⁵ Nikawrira, o fonos nangra ko mamicocok to faloco' nangra, o mamapitek ko pana' nangra.

¹⁶ Ano caacaay ka hakowa ko nitatoyan no mo^celay a tamdaw, nikawrira, ikaka no nika adihay no nitatoyan no tatiihay a tamdaw ko nika adihay no dafong ningra.

¹⁷ Nawhani o papiteken no Tapang ko patlaw no tatiihay a tamdaw, o dadipoten Ningra ko mo^celay a tamdaw.

¹⁸ Dipoten no Tapang ko mangodoay Cingraan a tamdaw to romi'ami'ad, o mamalonangrato a tahada'oc konini a sra.

¹⁹ Ano kapadesanto nangra i, caay ka maan cangra, ano kakdalanto i, o mamafcol cangra.

²⁰ Nikawrira, o misa'adaay to Tapang i, o mamatiya o hana no pala a marasras, o mamatiya o 'acfel cangra a malahdaw. Saka, o mamatkop ko tatiihay a tamdaw.

²¹ O tatiihay a tamdaw i, caay patikol to nicaliwan nangra, nikawrira, o mo^celay a tamdaw i, maolah a padahof.

²² O mapalmeday no Tapang a tamdaw i, o rarihaday a maro' tonini a sra, nikawrira, o ni'kakan no Tapang a tamdaw i, o mamalaplap cangra a mapasadak.

²³ O Tapang ko mikriday to tamdaw a pasifana' to dado^doen ningra a lalan, dipoten Ningra ko rakat no mitooray Cingraan.

²⁴ Ano matolotolo' cingra i, ma^dengho cingra a lomowad, nawhani padamaen no Tapang cingra a palowad.

²⁵ Nano ka^mangan ako a tahanini i nika to'as ako i, awaho a ma'araw ako ko mafalahay no Tapang a mo^celay a tamdaw, awaayho a ma'araw ako ko miki'a'amay a wawa nangra.

²⁶ O halipadahofay ko mo^celay a tamdaw, caay ka 'idi cingra a pacaliw i taowanan, saka, o mamalmed ko wawawawa nangra a ma^min.

²⁷ O laliyasen namo ko tatiihay a midmak to nga'ayay, ta mida'oc ko wawawawa namo a maro' tonini a sra.

²⁸ Nawhani maolah ko Tapang to mo^celay a dmak, caay pifalah Cingra to so'linay a mitoor a finawlan Ningra. Dipoten Ningra cangra a tahada'oc, nikawrira, laplapen Ningra ko wawawawa no tatiihay a tamdaw.

²⁹ O cacisra ko mo^celay a tamdaw, o rarihaday ko kasarayray nangra maro' tonini a sra.

³⁰ O sakacitaneng ko sowal no mo^celay a tamdaw, sahto o mo^celay ko sowal ningra.

³¹ Ira i faloco' ningra ko rikec no Kawas, saka, caay ka tahoriyac ko wa'ay ningra.

³² Misa'imer ko tatiihay a tamdaw to sapipatayaw to mo^celay a tamdaw.

³³ Nikawrira, caay pifalah ko Tapang i cingraan a patorod i 'ada, ano pisawkitan i, caay pasteken Ningra cingra i raraw.

³⁴ Kahalamham a hinatala to Tapang, ka'imer a mido^do to limo'ot Ningra, ta paflien Ningra kamo to 'icel to mamirocek tora sra, o mama'araw haca iso ko tatiihay a tamdaw a malaplap.

³⁵ Ma'araw ako ko ccay a mari'angay a tatiihay a tamdaw, matiya o lahad no fidngal no Lipanon ko nika lahad no tatiihay a tamdaw.

³⁶ Nikawrira, yo miliyaw kako a pakayra i, malahdawto cingra, kilimen ako cingra i, awaay a matama ako cingra.

³⁷ Hapinangen ko nga'ayay a tamdaw, nengnengen ko mo^celay a tamdaw. O maolahay to rihaday a tamdaw i, malnak ko tloc ningra.

³⁸ Nikawrira, matkop ko ciraraway a tamdaw, malasawad ko tloc nangra.

³⁹ Pa'oripen no Tapang ko mo^celay a tamdaw, ano mapades cangra i, dipoten Ningra cangra.

⁴⁰ Padamaen no Tapang cangra a pa'orip, pa'oripen Ningra cangra a paliyas nai tatiihay a tamdaw, nawhani pasayra cangra a milongoc to pipa'ading Ningra.