'Olic 36 - 阿美語聖經-新約附詩篇箴言

O Faloco' no Tatiihay a Tamdaw

O 'olic ni Tafiti, o matayalay no Tapang . Mapatorod i kakridan no paradiway.

¹ Paoraor a pasowal ko raraw i faloco' no tatiihay a tamdaw, <> saan.

² Misalata'ata'ang ko ciraraway a tamdaw, caay ka hapinang no Kawas ko raraw ako, caay ko mamitfoc Cingra to raraw ako, saan cingra.

³ Sahto o tatiihay ato misafana'ay ko sowal ningra, malasawadto ko sakafana' ningra a miharateng to nga'ayay a dmak.

⁴ Ano i kafoti'anto cingra i, misahalaka cingra to tatiihay a dmak, caayto ka sapisawadan cingra to tatiihay a dmak.

O Nika Nga'ay no Kawas

⁵ Tapangaw, maldef i kakarayan ko caay ka falic a olah Iso, tangasato i to'em ko nika takaraw no so'lin Iso.

⁶ Matiya o nika tanektek no takaraway a lotok ko nika tanektek no mo^celay a dmak Iso. Matiya o nika talolong no riyar ko nika talolong no pihapinang Iso. Tapangaw, madipot Iso ko tamdaw ato pina'orip a ma^min.

⁷ Kawasaw, wata: ko nika tadamaan no caay ka falic a olah Iso. Miki'ading a ma^min ko tamdaw i laloma' no sapikpik Iso.

⁸ Mitahka cangra to kadofahay a kakaenen i loma' Iso, pananomen Iso cangra toya sakalipahak a nemnem Iso.

⁹ O tatapangan no 'orip Kiso, o nano nipatdian Iso ko sakata^ngad niyam.

¹⁰ Nanay mararid ko pidipot Iso to mafana'ay i Tisowanan, nanay mararid ko pisanga'ay Iso to mo^celay a tamdaw.

¹¹ Aka haydaen ko pisamsam no malata'angay a tamdaw i takowanan, aka haydaen ko pilaplap no tatiihay a tamdaw i takowanan.

¹² Nengnengen, matolo'to ko tatiihay a tamdaw. Mawakangto cingra itira, caayto ko lalomowad cangra.