'Olic 34 - 阿美語聖經-新約附詩篇箴言

O Nika Hmek to Sini'ada no Kawas

O nitilidan ni Tafiti a 'olic, yo malaplapto ni Apimilik a hongti cingra a pakomafolaay a tamdaw.

¹ O mamararid kako a mikansiya to Tapang, caay ko mamitolas kako a pahmek i Cingraan.

² O papahmek kako to tadamaanay a nidmakan no Tapang, nanay lipahak kamo o mapa^kelay a tamdaw a mitngil tonini.

³ Pikapot i takowanan a pahmek to nika tadamaan no Tapang, hmeken ita a palosiyang ko ngangan Ningra.

⁴ Milongoc kako to Tapang i, paca'of Cingra, paliyasen Ningra kako nai masamaamaanay a katalawan ako.

⁵ Ano misafaloco' to Tapang ko mapa^kelay a tamdaw i, malipahak cingra, caayto ko mamasefad ko faloco' nangra a tahada'oc.

⁶ Tngilen no Tapang ko pitahidang no awaay ko palawinaan a tamdaw, paliyasen Ningra a pa'orip cangra nai masamaamaanay a pades.

⁷ Dipoten no coyoh no Tapang ko mangodoay to Tapang, pa'oripen Ningra cangra a paliyas nai katalawan.

⁸ Lifeten a mihapinang ko nika nga'ay no Tapang, o miti'eray i Cingraan i, tada o malmeday.

⁹ Kamo o fangcalay a finawlan no Tapang, kangodoen Cingra. O mangodoay i Cingraan a tamdaw i, awaay ko maan aca a kacango'otan.

¹⁰ Ano o toforto a layon i, ira ko kacango'otan a macahiw, nikawrira, o milongocay to Tapang i, awaay ko maan aca a kacango'otan.

¹¹ Kamo o ka^mangay, pitngil to sowal ako. Pasifana'en ako kamo to sakangodoaw namo to Tapang.

¹² Mangalay kamo a lipahak ko 'orip haw? Mangalay kamo a kakaya' ko 'orip haw?

¹³ Ano hatira i, aka pasowal ko sma namo to tatiihay a sowal, aka pisamangah ko filfil namo a somowal.

¹⁴ Falahen ko tatiihay, ka o nga'ayay ko dmak, ka o sakararihaday ko safaloco'en a misa'icel.

¹⁵ Midipot ko Tapang to mo^celay a tamdaw, mitngil Cingra to pingitangit nangra a mitolon.

¹⁶ Nikawrira, misa'ada ko Tapang to tatiihay ko dmak a tamdaw, ano mapatay cangra i, tangsol a mapawan no tamdaw cangra.

¹⁷ Ano mitahidang a mingitangit to Tapang ko mo^celay a tamdaw i, tngilen Ningra, pa'oripen Ningra a paliyas nai masamaamaanay a pades cangra.

¹⁸ Patihien no Tapang ko mararomay matoleday a tamdaw, pa'oripen Ningra ko maksemay ko faloco' a tamdaw.

¹⁹ O mo^celay a tamdaw i, adihay ko malitmohay ningra a pades, nikawrira, pa'oripen no Tapang cangra a paliyas nai tini tonini a pades a ma^min.

²⁰ Masongila' ko pidipot no Tapang i cingraan, awaay ko ccaccay aca a mapitekay a 'okak ningra.

²¹ O tatiihay a tamdaw i, o tatiihay a dmak ningra ko sakapatay ningra. O mi'intelay to mo^celay a tamdaw i, o tatfocen no Kawas.

²² Pa'oripen no Tapang ko matayalay Ningra, caay ko mamatfoc ko miti'eray Cingraan a tamdaw.