'Olic 33 - 阿美語聖經-新約附詩篇箴言

O Sapahmek a Radiw

¹ Kamo o polong no mo^celay a tamdaw, pipasayra i Tapang a milkal, kamo o polong no mo^celay a tamdaw, pipahmek i Cingraan a ma^min.

² Pidatok a pahmek a miahowid to Tapang, ka o mo^tepay ko kliw a datok ko sapahmek a romadiw i Cingraan.

³ Patngilen Cingra to fa^lohay a radiw, songila'en ko pidatok, satata'angen ko ngiha' a romadiw.

⁴ O so'linay ko sowal ato nidmakan no Tapang a ma^min.

⁵ O mo^celay ato malalenay a dmak ko kaolahan no Tapang, maldef ko hkal to caay ka falic a olah Ningra.

⁶ O nano sowal no Tapang ko sakasanga' no kakarayan ato cidal ato folad ato fo'is.

⁷ Samatiya han Ningra o piparo i ci^keng to nanom ko nipipalaccay a patli to nanom no riyar. Matiya o mina'angay i 'ariri ko pipatli Ningra to nanom no riyar.

⁸ Kamo o polong no i hkalay a ma^min, kangodoen ko Tapang, kamo o i hkalay a tamdaw a ma^min, kangodoen Cingra.

⁹ Pasowal han Ningra i, irato ko hkal, palimo'ot han Ningra i, irato ko kalomaamaan.

¹⁰ Palasawaden no Tapang ko nisahalakaan no kasakitakit ato nisafacoan no kasafinawlan.

¹¹ O nisahalakaan no Tapang ato nafaloco'an Ningra i, caay ka falic a tahada'oc.

¹² O mangodoay to Tapang, o Kawas niyam sanay a kitakit i, tada o malmeday. O nipili'an Ningra to maloningra a finawlan i, tada o malmeday.

¹³ Pasila^no ko Tapang a minengneng to polong no tamdamdaw.

¹⁴ Mikcor Cingra nai kamaro'an Ningra a minengneng to i hkalay a finawlan.

¹⁵ Cingra ko misafacoay to faloco' no kahaccaccay a tamdaw, mafana'ay Cingra to nidmakan nangra a ma^min.

¹⁶ Caay ko nika 'aloman no sofitay ko sapakalowid no hongti, caay haca ko nika ci'icel no sofitay ko sakapipa'orip ningra.

¹⁷ Caay ko piti'er to sapilood a ^fa ko sapakalowid, caay ko 'icel no ^fa ko sapa'orip to tamdaw.

¹⁸ Dipoten no Tapang ko mangodoay i Cingraan a tamdaw, dipoten Ningra ko mitadi'ecay to sini'ada Ningra a tamdaw.

¹⁹ Pa'oripen Ningra cangra a paliyas nai patay, yo makdal i, pa'oripen Ningra cangra.

²⁰ O pafaloco'an ita ko Tapang, o padamaay, o midipotay i titaanan Cingra.

²¹ Matomes no lipahak ko faloco' ita, nawhani o miti'eray kita to fangcalay a ngangan Ningra.

²² Tapangaw, Kiso ko kacifaloco'an niyam, nanay mararid ko sini'ada Iso a mikapot i tamiyanan.