'Olic 31 - 阿美語聖經-新約附詩篇箴言

O Miti'eray a Pitolon

O 'olic ni Tafiti. Mapatorod i kakridan no paradiway.

¹ Tapangaw, milongoc kako to pipa'ading Iso i takowanan, nanay caay pakatoleden Iso kako a pakangodo. O mo^celay a Kawas Kiso saka, nanay pa'oripenho Iso kako!

² Nanay tngilenho ko pitolon ako, kalamkamen a mipadama kako! Nanay malapilimekan ako Kiso a midipot i takowanan, nanay malapisitaraan ako Kiso a pa'orip i takowanan.

³ O pilimekan a 'ongcoy ako Kiso, o pisitaraan ako Kiso, nanay do^doen Iso ko niktonan Iso a sowal a mikrid i takowanan.

⁴ Nanay paliyasen kako nai satilo no tao, nawhani o pilimekan ako Kiso.

⁵ Patoroden ako i Tisowanan ko 'adingo ako, Tapangaw, o so'linay a Kawas Kiso, o mamipa'oripay Kiso i takowanan.

⁶ Mi'intel kako to mita'ongay to mangah a kawas, nikawrira, miti'er kako to Tapang.

⁷ Malipahak kako to caay ka falic a olah Iso, manengneng Iso ko pisemsem ako, mafana' Kiso to nika pades ako.

⁸ Caay papirpeten Iso ko 'ada i takowanan, palimeken Iso kako i karihadayan.

⁹ Tapangaw, nanay kaadayayen kako, nawhani tahapades kako, mapato'to ko mata ako to nano katomangican ako, sararima sato ko tireng ato faloco' ako.

¹⁰ O nano pisemsem ako ko sakamalasawad ko 'orip ako, o nano rarom ako ko sakamamoko' ko mihcaan ako. O nika pades ako ko sakatadancato kako, halo'okakto ako a ma'icang.

¹¹ Milokes i takowanan ko 'ada ako a ma^min, matawa ko fiyafiyaw ako i takowanan, halowidawidang ako a matalawto i takowanan, malitmoh nangra kako i lalan i, miliyas cangra.

¹² Matiya o mapatayay kako a matawalto nangra, matiyato o nifalahan a lakaw kako.

¹³ Matngil ako ko kalahawhaw no 'alomanay a 'ada ako, katalawan a ma^min ko taliyokay ako. Misahalaka cangra to sapikari'angaw i takowanan, sapipatayan cangra i takowanan.

¹⁴ Nikawrira, Tapangaw, miti'er kako i Tisowanan, o Kawas ako Kiso.

¹⁵ Mararid a madipot Iso kako, nanay paliyasen kako nai 'ada ato mikari'angay i takowanan.

¹⁶ Nanay kasini'adaenho Iso a midipot ko matayalay Iso, o caay ka falic ko olah Iso saka, nanay pa'oripenho kako.

¹⁷ Tapangaw, mitahidang kako a milongoc i Tisowanan, nanay caay pakasefaden Iso ko faloco' ako. Nanay matfad ko tatiihay a tamdaw, i kaitiraan no mapatayay, ta caayto ka caciyaw cangra.

¹⁸ Nanay sooten Iso ko ngoyos no misamangahay, nanay caayto ka caciyaw ko misalata'ata'angay, milokesay, mikari'angay to mo^celay a tamdaw.

¹⁹ Wata: ko nika adihay no nina'angan Iso a makapahay a maamaan to saki mangodoay i Tisowanan. Dipoten Iso ko miti'eray i Tisowanan, tadamakapah a nengnengen no tamdamdaw ko nidmakan Iso.

²⁰ Palimeken Iso cangra i ka'ayaw Iso i karihadayan, ta caay ka kari'ang no misa'imeray a tamdaw, palimeken Iso cangra i karihadayan a mitahpo, ta caay ka samsam no 'ada cangra.

²¹ O hahmeken ko Tapang. Yo malikot no 'ada kako a milood i, pahapinang Cingra to caay ka falic a olah Ningra i takowanan.

²² Cihinapec a matalaw ko faloco' ako, latek o nifalahanto Iso kako nasa kako, nikawrira, yo pasayra kako a mingitangit to pipadama Iso i, mitngil Kiso to pingitangit ako.

²³ Kamo o so'linay a finawlan no Tapang, kaolahen Cingra. Dipoten no Tapang ko so'linay ko faloco' a tamdaw, nikawrira, caay ka samadah ko pitfoc Ningra to misatakaraway a tamdaw.

²⁴ O polong no hinatalaay to Tapang, saki^melen, kacicdi kamo.