'Olic 28 - 阿美語聖經-新約附詩篇箴言

O Pitolon a Milongoc to Pipadama

O 'olic ni Tafiti.

¹ Tapangaw, pasayra kako i Tisowanan a mitahidang a milongoc, midipotay i takowanan, nanay tngilenho ko pitahidang ako, ano caay pipaca'of Kiso i, o mamilcad kako toya mamatkop a tamdaw a mapatay.

² Pasayra kako i Fangcalay Pita'ongan a mipakamay a mingitangit to pipadama Iso, nanay tngilenho ko pilongoc ako.

³ Aka palcaden kako ato tatiihay a tamdaw a mipastek i patay, manga'ay ko sowal nonini a tamdaw a misawidawidang, nikawrira, matomes no ci'intelay ko faloco' nangra.

⁴ Nanay o nano nidmakan nangra to tatiihay ko pi'arawan Iso a mitfoc i cangraan, pakaynien i tatodong no raraw nangra ko sapatatodong i cangraan.

⁵ Nawhani mi^pec cangra to nidmakan no Tapang ato nisanga'an Ningra, saka, o tatfocen no Tapang cangra a palasawad a tahada'oc.

⁶ O hahmeken ako ko Tapang, nawhani o mitngilay Cingra to pitahidang ako a mingitangit to pipa'orip Ningra.

⁷ O 'icel ako, o sapatada ako ko Tapang, masarocod ko faloco' ako a miti'er i Cingraan. Mapadama Ningra kako saka, lipahak kako, o hahmeken ako Cingra a romadiw.

⁸ O 'icel no finawlan Ningra ko Tapang, o pa'adingay a pa'orip Cingra to nipatirengan Ningra a hongti.

⁹ Tapangaw, nanay pa'oripen Iso ko finawlan Iso, palmeden ko finawlan no Miso. Nanay dipoten Iso cangra, dimokosen Iso cangra a tahada'oc.