'Olic 27 - 阿美語聖經-新約附詩篇箴言

O Sapahmek a Pitolon

O 'olic ni Tafiti.

¹ O likat ako ko Tapang, o pa'oripay i takowanan, saka, cimaho ko katalawan ako saw? O midipotay to 'orip ako ko Tapang, saka, o maanho ko katalawan ako saw?

² Yo miraod ko tatiihay a tamdaw a sapipatayan i takowanan i, cangra ko tahafikoday a matolo'.

³ Ano iraira ko 'alomanay a sofitay a milikot i takowanan i, caay ka talaw kako. Ano iraira ko 'ada a milood i takowanan i, deng o Kawas ko piti'eran ako.

⁴ Ira ko ccay a longoc ako i Tapang, deng onini a ccay ko kangalayan ako, o sapida'ocaw ako a maro' i loma' no Tapang, itira kako i pita'ongan a minengneng to nika 'dil Ningra a makapah, milongoc kako to pikrid Ningra i takowanan.

⁵ Yo mapades kako i, pa'adingen Ningra kako, Cingra ko sakarihaday ako i Talo'an Ningra. Patlien Ningra kako i takaraway a 'ongcoy,

⁶ Saka, malowid ako ko i taliyokay ako a 'ada. O a itira kako i Fangcalay Pita'ongan Ningra a milkal a pato'aya, pahmek kako a romadiw to Tapang.

⁷ Tapangaw, nanay tngilen Iso ko pilongoc ako, nanay kaadayayenho kako, paca'ofenho kako.

⁸ Sowal sa Kiso i takowanan, <> saan. Tapangaw, tayniay kako a mikilim i Tisowanan,

⁹ nanay caay piliyas Kiso i takowanan a misatalifokil. Nanay caay ka kter Kiso i takowanan, nanay caay ka laplapen Iso kako o matayalay Iso, o marariday Kiso a padama i takowanan. O pa'oripay a Kawas ako, nanay caay ka falahen Iso kako.

¹⁰ Ano falafalahen no mama ato ina kako i, o aalaen no Tapang kako a midipot.

¹¹ Tapangaw, nanay pahapinangen kako to dado^doen ako a lalan. Kriden kako a parakat i marayasay a lalan. Nawhani 'alomanay ko misa'imeray i takowanan a 'ada.

¹² Samangahen nangra kako a mipatalaw a mikari'ang, nanay caay ka tfaden Iso kako i kamay nangra.

¹³ Paso'lin kako, o mamatala no 'orip ako ko pipalmed no Tapang.

¹⁴ Piti'er to Tapang. Sa'icelen ko faloco'. Ti'eren ko Tapang.