'Olic 26 - 阿美語聖經-新約附詩篇箴言

O Pitolon no Mo^celay a Tamdaw

O 'olic ni Tafiti.

¹ Tapangaw, nanay pasteken Iso kako i awaay ko raraw, nawhani o mo^celay ko dmak ako, masarocod ko faloco' ako a miti'er i Tisowanan.

² Tapangaw, nanay hapinangen Iso kako, lifeten kako, nanay hapinangen Iso ko faloco' ato harateng ako.

³ Nawhani o caay ka falic a olah Iso ko mikriday i takowanan, mararid a mikrid ko so'lin Iso i takowanan.

⁴ Caay pinaol kako to misamangahay a tamdaw, caay pikapot kako to misakaniway a tamdaw.

⁵ Ma'osi kako a mikapot to ciraraway a tamdaw, miliyas kako to tatiihay a tamdaw.

⁶ Tapangaw, monanaw kako to kamay a pahapinang to nika awa no raraw ako, ta mitaliyok kako to pipato'ayaan a mita'ong i Tisowanan.

⁷ Romadiw kako to sapikansiya a 'olic a radiw, pasowal kako to kafahka'an a nidmakan Iso a ma^min.

⁸ Tapangaw, maolah kako to kamaro'an Iso a loma', maolah kako to nika ci'dil Iso itira.

⁹ Nanay caay pahaklongen Iso kako to ciraraway a tamdaw a mitkop, nanay caay pakapoten Iso kako to mari'angay a tamdaw a palasawad.

¹⁰ Nawhani mararid cangra a midmak to tatiihay, tayra cangra i cowacowa a miala to sapa'alofo.

¹¹ Nikawrira, kako to no mako i, o mo^celay ko dmak ako, nanay kaadayayenho kako, pa'oripenho kako.

¹² Tomireng to kako i masadafdafay a pala, Saka, o papahmek kako to Tapang i kasa'opoan no polong no finawlan.