'Olic 19 - 阿美語聖經-新約附詩篇箴言

O Katadamaan no Nisanga'an no Kawas

O 'olic ni Tafiti. Mapatorod i kakridan no paradiway.

¹ Pasowal ko kakarakarayan to nika tadamaan no Kawas. Mapalosiyang no tahaf no kakarayan ko nisanga'an Ningra.

² Pasowal to romi'ami'ad to dadayadaya a patnak,

³ caay ka caciyaw, caay ka pasowal, awaay ko soni, awaay ko ngiha' niira.

⁴ Nikawrira, maldef i polong no tamdaw ko soni nanira, tangasa i tolas no kakarayan ko sowal nanira. Sanga'en no Kawas ko talo'an no cidal i dohaw no kakarayan,

⁵ matiya o masadakay nai kafoti'an a fa^lohay a fa'inay a romakat ko nika sadak no cidal, matiya o cicdiay a tamdaw a lipahak a comikay ko nika sadak niira.

⁶ Nanitira i fati'iyan no kakarayan a masadak ko cidal, mitaliyok to kakarayan a tayra i roma a fati'iyan, maldef no fa^det niira a matarang ko kalomaamaan.

O Rikec no Tapang

⁷ O masongila'ay ko rikec no Tapang, o sakafa^loh no 'orip no tamdaw, o ma^dengay a tati'eren ko limo'ot no Tapang, o sakacitaneng no mafokilay a tamdaw.

⁸ O mo^celay ko limo'ot no Tapang, o sakalipahak no mido^doay a tamdaw, o so'linay ko sifana' no Tapang, o sakata^ngad no mata no faloco' no tamdaw.

⁹ O mangodoay to Tapang i, o makoracay a tahada'oc, o so'linay ko niktonan no Tapang a dmak, o mo^celay a tahada'oc.

¹⁰ Ikaka no tada^kim ko nika tadamaan niira, ikaka no safangcalay a tada^kim ko nika fangcal niira, ikaka no ko^sanay a waneng no 'odal, ikaka no safangcalay a 'odal.

¹¹ Saka, onini a sowal Iso ko papina'onay to matayalay Iso a papi'imer, ano ma'imer ko matayalay Iso, o mamarafiyas ko sakaci^poc.

¹² Cima ko ma^dengay a mipalita to patlac no tireng saw? Nanay hpolen Iso ko caay ko nipadtengan ako a patlac.

¹³ Nanay fo'oten Iso kako o matayalay Iso to saka^caaw paci^ci ako a ciraraw, ta caay ka palit no raraw kako. Ta o awaay ko tatoro'en a raraw a masongila'ay a tamdaw kako.

¹⁴ Tapangaw, o 'ongcoy ako, o pa'oripay takowanan. Nanay o karahkeran Iso a milayap ko sowal ako ato harateng ako.