'Olic 18 - 阿美語聖經-新約附詩篇箴言

O Radiw ni Tafiti tona Pakalowid

O 'olic ni Tafiti, o matayalay no Tapang . Mapatorod i kakridan no paradiway. Itiya yo mapa'orip no Tapang cingra a paliyas nai kamay ni Sawlo ato romaroma a 'ada ningra toyanan a romi'ad, onini ko sapa'olic ni Tafiti to Tapang .

¹ Tapangaw, Kiso ko sakaci'icel ako, tadamaolah kako i Tisowanan.

² O midipotay takowanan a 'ongcoy ato pisitaraan ko Tapang, o mitahpoay takowanan a pilimekan ako ko Kawas ako, o midipotay takowanan a sapatada ato mipa'oripay i takowanan a 'icel, o piki'adingan ako Cingra.

³ Mitahidang kako a milongoc i papahmeken a Tapang, saka, pa'oripen Ningra kako a paliyas nai 'ada.

⁴ Mifedfed ko towaso no patay a mitaliyok i takowanan, mistol ko kalidkid no mitkopay i takowanan.

⁵ Mifedfed ko towaso no kaitiraan no patay i takowanan, mitala ko tilo no tadem i takowanan.

⁶ Yo mapades kako i, mitahidang kako to Tapang, milongoc kako to pipadama no Kawas ako. Matngil Ningra i Fangcalay Pita'ongan Ningra ko ngiha' ako, micomodto i tangila Ningra ko ngiha' ako a milongoc to pipa'orip Ningra.

⁷ Itiya i, mangernger ko sra, mangiyangi ko paranaan no lotolotok, nawhani makter ko Kawas.

⁸ Masadak i ngoso' Ningra ko 'acfel, masadak i ngoyos Ningra ko mayamayamay a namal ato marengrengay a 'acfel.

⁹ Fawahen Ningra ko kakarayan a ma^pod, ira i pasaripa'an Ningra ko kohtingay a to'em.

¹⁰ Midakaw Cingra to kirupim a ma^fer, pakaynien Ningra i sapikpik no fali ko saka kaliki a ma^fer.

¹¹ O to'man ko sapitahpo Ningra to tireng Ningra, mataliyok no cinanomay a kiftolay a to'em Cingra.

¹² Masadak ko masa'ikayay a so^da ato marengrengay a 'afel nai 'dil i ka'ayaw Ningra, mapowak koya koftolay kohtingay a to'em.

¹³ Pakaklengen no Tapang nai kakarayan, pasadaken no Isatakaraway ko ngiha' Ningra.

¹⁴ Pana'en Ningra a paliwasak ko 'ada Ningra, pasadaken Ningra ko fitili' a milaplap i cangraan.

¹⁵ Tapangaw, kapo'iyen Iso ko 'ada, kakter han Iso a micli' cangra i, talahkalto ko tatnaan no riyar, mahapinangto ko paranaan no sra.

¹⁶ Laya' sa to kamay ko Tapang nai kakarayan a mirpet i takowanan, pasadaken Ningra kako nai talolongay a nanom.

¹⁷ Pa'oripen Ningra kako a paliyas nai kamay no ci'icelay a 'ada, paliyasen Ningra kako nai mi'intelay takowanan a tamdaw, nawhani ikaka ako ko nika ci'icel nangra a ma^min.

¹⁸ Yo mapades kako i, looden nangra kako, nga'ayay ira ko Tapang a midipot i takowanan.

¹⁹ Maolah Cingra i takowanan saka, pa'oripen Ningra kako, kriden Ningra kako a paliyas nai kacalemceman.

²⁰ O nika mo^cel ako saka, pakaolahen no Tapang kako, o nika awa no raraw ako saka, palmeden Ningra kako.

²¹ O mido^doay kako to lalan no Tapang, caayho pipacoli kako to Kawas ako.

²² O ma'imeray kako to rikec Ningra a ma^min, caayho piliyang kako to limo'ot Ningra.

²³ Mafana' Cingra to nika awa no patlac ako, o miliyasay kako a miraay to tatiihay.

²⁴ Orasaka, do^doen no Tapang ko nika mo^cel ako a pakaolah i takowanan, nawhani mafana' Cingra to nika awa no raraw ako.

²⁵ Tapangaw, o so'linay a tamdaw i, o so'linay ko pihamham Iso i cingraan, o nga'ayay a tamdaw i, o nga'ayay ko pihamham Iso i cingraan.

²⁶ O makoracay a tamdaw i, o makoracay ko pihamham Iso i cingraan, o tatiihay a tamdaw i, sa'adaen Iso cingra.

²⁷ Pa'oripen Iso ko misapo^neray ko faloco' a tamdaw, tfaden Iso ko misatakaraway ko faloco' a tamdaw.

²⁸ Tapangaw, likaten Iso ko dawdaw ako, o palasawaday ko Kawas ako to to'man.

²⁹ O pafliay Kiso i takowanan to sapilowid to 'ada a 'icel, saka, ma^deng kako a mipelpel to pisitaraan nangra a 'adipel.

³⁰ O masongila'ay ko dmak nonini a Kawas, o so'linay a tati'eren ko sowal Ningra. Matiya o sapatada Cingra a midipot to miti'eray i Cingraan a tamdaw.

³¹ O dengan o Tapang ko Kawas, awaay ko roma, o dengan onini a Kawas ko piki'adingan ita a 'ongcoy.

³² Onini a Kawas ko pafliay i takowanan to 'icel, Cingra ko sakarihaday no rakat ako i lalan.

³³ Samatiyaen Ningra o tariktik no tawinaan a malonem ko rakat ako, saka, sarihaday sa ko rakat ako i tokotokosan.

³⁴ Pananamen Ningra kako to sakafana' a milood, saka, ma^deng kako a minayat to 'ifcangay a focol no pana'.

³⁵ Tapangaw, o pa'oripay i takowanan a sapatada Kiso, o kawanan a kamay Iso ko midamaay i takowanan, o pidipot Iso ko sakalomowad ako.

³⁶ Kiso ko misakakahaday to lalan ako, saka, caayho ka tolo' kako.

³⁷ Lpelen ako ko 'ada a mirpet i cangraan, ano caay ka lowid cangra i, caay pitolas kako.

³⁸ Malowid ako cangra a milood saka, caayto ka tomireng cangra, taflik sato cangra a ma^min i pasaripa'an ako.

³⁹ Mapafli Iso kako to sapilood a 'icel, saka, ma^deng kako a milowid to 'ada.

⁴⁰ Kiso ko sapilaliw no 'ada i takowanan, Kiso ko sakapakatkop ako to mi'intelay i takowanan.

⁴¹ Mitahidang cangra a milongoc to papa'orip, nikawrira, awaay ko mama^deng a pa'orip i cangraan. Pasayra cangra i Tapang a milongoc, nikawrira, caay pakalayap to ca'of Ningra.

⁴² Fonalen ako cangra a palaaped, samatiya sato o mafiyokay no fali a alafoh a maliwasak cangra, sakasaken ako cangra a matiya o pisakasak to alafoh i lalan.

⁴³ Pa'oripen Iso kako a paliyas nai pacoliay a finawlan, Patirengen Iso kako a palakakridan no kasakitakit, halo roma a finacadan a mihaklong i takowanan.

⁴⁴ Ano matngil nangra ko sowal ako i, tangsol cangra a mihaklong, mipitosor a ma^min i ka'ayaw ako ko roma a finacadan.

⁴⁵ Matoledto cangra a awaayto ko cdi, mirmir sato cangra a masadak nai pisitaraan nangra.

⁴⁶ O mida'ocay a ma'orip ko Tapang, o hahmeken namo ko midipotay i takowanan. O pa'oripay i takowanan ko Kawas. O papalosiyangen namo ko nika tadamaan Ningra.

⁴⁷ Cingra ko sakapakalowid ako to 'ada, Cingra ko sakapisodod no kasafinacadan i takowanan,

⁴⁸ o romasato, pa'oripen Ningra kako a paliyas nai 'ada. Tapangaw, Kiso ko sakapakalowid ako to 'ada, pa'oripen Iso kako a paliyas nai mari'angay a tamdaw.

⁴⁹ Orasaka, o papalosiyangen ako i roma a finacadan Kiso, o papahmeken ako a romadiw Kiso.

⁵⁰ O nipatirengan no Kawas a hongti i, kinapinapi:nato a pakalowid. I tini Cingra a pahapinang i nipili'an Ningra ci Tafitian ato tloc ningra to caay ka falic a olah Ningra.