'Olic 17 - 阿美語聖經-新約附詩篇箴言

O Pitolon no Awaay ko Raraw a Tamdaw

O tolon ni Tafiti.

¹ Tapangaw, nanay tngilenho ko pilongoc ako to mo^celay a dmak, nanay tngilenho Iso ko pilongoc ako, nanay tngilenho Iso ko awayay ko mangah a faloco' ako a pitolon.

² Nanay pasteken kako i awaay ko raraw, nawhani mafana' Kiso to nika o maan ko mo^celay.

³ Mafana' Kiso to laloma' no faloco' ako, tayni Kiso to dadaya a mihapinang i takowanan, kadkaden Iso kako a milifet a mihapinang i, awaay a matama Iso ko maan aca a tatiihay a harateng ako.

⁴ Caay ka matiya o tao kako a somowal to tatiihay a sowal, o mido^doay kako to limo'ot Iso, caay ka romakat kako to lalan no mari'angay a tamdaw.

⁵ Mararid kako a mido^do to nasaripa'an Iso, caayho piliyas kako.

⁶ Kawasaw, milongoc kako i Tisowanan, nawhani caay ka ^ca pipaca'of Kiso i takowanan, nanay pasaynienho ko tangila Iso a mitngil to pilongoc ako.

⁷ Nanay patalahkalenho koya kafahka'an a sini'ada Iso a pa'orip i takowanan, o piki'adingan Kiso saka, ma^deng kako a milimek to 'ada ako.

⁸ Nanay dipoten Iso kako, matiya o pidipot to mata no tireng, palimeken kako i laloma' no sapikpik Iso,

⁹ paliyasen kako nai pikari'ang no tatiihay a tamdaw. Satilii sa ko 'ada a milikot i takowanan,

¹⁰ 'atkak ko faloco' nangra, malata'ang a somowal.

¹¹ Ano talacowacowa kako i, ira cangra a milikot i takowanan, mikilim cangra to kanga'ayan nangra a mitfad i takowanan.

¹² Matiya o layon cangra a sapicinasan i takowanan, matiya o tofor a layon cangra a misa'imer i to'manay a mitala i takowanan.

¹³ Tapangaw, kalomowad a milood to 'ada ako, lowiden cangra. Nanay o fonos Iso ko sapa'orip Iso i takowanan a paliyas nai tatiihay a tamdaw.

¹⁴ Tapangaw, nanay o sakowan Iso ko sapa'orip Iso i takowanan a paliyas nai cangraan, oya cidafongay kadofahay a tamdaw anini tonini a hkal. Nanay sakartengen Iso ko pitfoc i cangraan, nanay marnec ko wawa nangra to pades, o 'osaw nangra i, sidayen to saki wawa no wawa nangra.

¹⁵ Nawhani o mo^celay kako, o mama'araw ako Kiso, ano mapalalto kako i, o lalipahak kako to nipikapot Iso i takowanan.