'Olic 16 - 阿美語聖經-新約附詩篇箴言

O Miti'eray a Pitolon

O nito^to'an ni Tafiti a 'olic.

¹ Kawasaw, nanay dipoten kako, nawhani o miti'eray kako i Tisowanan.

² Pasowal kako to Tapang, <> han ako.

³ Wata: ko nika tadamaan no so'linay a finawlan no Tapang. O pikapot ako i cangraan ko sakakaay a lipahak ako.

⁴ Nikawrira, oya mihaklongay a tamdaw to romaroma a kawakawas i, o sakararid nangra a mapades. Caay ko mamikihatiya kako to pisalisin nangra, caay ko mamita'ong kako to kawakawas nangra.

⁵ Tapangaw, Kiso ko tadadafong ako, Kiso ko tatapangan to sakalmed ako, Kiso ko mipa'adingay to mipaflian Iso i takowanan.

⁶ Mapalilam Iso kako to mifakciwan Iso a makapahay a sra, tadamakapah konini a pala.

⁷ Mipahmek kako to Tapang, nawhani mipasifana' Cingra i takowanan, o dadaya i, mipalal ko nga'ayay a faloco' ako i takowanan a papina'on.

⁸ Mararid a mahapinang ako ko nika ira no Tapang i ka'ayaw ako, ira Cingra i tatihi ako saka, caay ko mamangiyangi kako.

⁹ Orasaka, mahmek ko faloco' ako, malipahak ko 'adingo ako, marihaday a tanektek ko tireng ako,

¹⁰ nawhani caay ko fafalahen Iso kako i kaitiraan no mapatayay, caay ko mamihayda Kiso to nika patay no so'linay ko faloco' a matayalay Iso.

¹¹ O pahapinangay Kiso i takowanan to sakaci'orip a lalan. Ano i ka'ayaw Iso kako i, tadalipahak kako, ano i tatihi Iso kako i, ira ko mida'ocay a sakalmed ako.