'Olic 148 - 阿美語聖經-新約附詩篇箴言

O Pitahidang to Tahaf no Kakarayan a Papipahmek to Kawas

¹ Haliluya! Pipahmek kamo nai kakarayan to Tapang. Kaitira kamo isatakaraway a kakarayan a pahmek to Tapang.

² Kamo o coyocoyoh Ningra, pipahmek kamo Cingraan. Kamo o sofitafitay Ningra, pipahmek kamo Cingraan.

³ Cidalaw, foladaw, pipahmek kamo Cingraan. Kamo o falatfatay a fo'ifo'is, pipahmek Cingraan.

⁴ Kamo o i fafaeday a kakarakarayan, pipahmek Cingraan. Kamo o i fafaeday no kakarayan a nanom, pipahmek Cingraan.

⁵ Nanay mipahmek to ngangan no Tapang konini a ma^min. Nawhani palimo'ot han Ningra i, masanga'to a ma^min ko maamaan.

⁶ Mapastekto Ningra ko kamaro'an no paytmek a tahada'oc, awaay ko papakafilo a miliyang to limo'ot Ningra.

^7-8 Pipahmek kamo nai sra to Tapang. Kamo o kangic no riyar ato i talolongay no riyar, o kalapiyat ato 'ikay no so^da ato so^da ato to'em, o mido^doay to limo'ot a faliyos,

⁹ kamo o tokotokos ato taporoporo, o losay a kilang ato kilakilangan,

¹⁰ o 'a'adopen ato pina'orip, o manafoyay i sra a fao ato ma^feray a 'ayam, pipahmek kamo a ma^min i Cingraan.

¹¹ Kamo o hongtingti ato kasafinawlan ato wawa no hongtingti ato mikowanay a ma^min

¹² ato kapah ato kaying ato mato'asay ato ka^mangay, pipahmek kamo a ma^min i Cingraan.

¹³ Nanay mipahmek cangra a ma^min to ngangan no Tapang. Deng o ngangan Ningra ko kakangodoan, mita'lif to kakarayan ko nika tadamaan Ningra.

¹⁴ Cingra ko sakalomowad no finawlan Ningra, saka, mipahmek a ma^min i Cingraan ko so'linay ko faloco' a finawlan no Israil ato kaolahan Ningra a finawlan. Haliluya!