'Olic 147 - 阿美語聖經-新約附詩篇箴言

O Pipahmek to Ci'icelay a Kawas

¹ Haliluya! O karomadiw a pahmek to Kawas ita i, o tadanga'ayay. O tadakalipahakan ko pipahmek i Cingraan, o matatodongay konini.

² O Tapang ko miliyaway a patireng to Yirusalim, o nisa'opoan Ningra a panokay koya maliwasakay a Israil.

³ O mihinomay Cingra to mararomay a tamdaw, o mitafoay Cingra to doka' nangra.

⁴ O nisa'osian Ningra ko adihay no fo'is, mahaccay Ningra a mipangangan ko fo'is.

⁵ O tadamaanay, o ci'icelay ko Tapang ita, caay ko mamalalat ko taneng Ningra.

⁶ Palowaden no Tapang ko tadancaay a tamdaw, nikawrira, tfaden Ningra ko tatiihay a tamdaw.

⁷ Karomadiw a mikansiya to Tapang, pidatok a pahmek to Kawas ita.

⁸ Nawhani claken Ningra ko to'em a mitahpo to kakarayan, tfaden Ningra ko 'orad a misnger to sra, ta molngaw ko talod i lotolotokan.

⁹ Paflien Ningra to kakaenen ko 'a'adopen, pakaenen Ningra ko tomangicay a ciwciw no palang.

¹⁰ Caay ko 'icel no ^fa ko kangalayan Ningra, caay ko cicodahay a sofitay ko karahkeran Ningra.

¹¹ Nikawrira, maolah ko Tapang to mangodoay Cingraan a tamdaw, maolah Cingra to miti'eray to sini'ada Ningra a tamdaw.

¹² Yirusalimaw, pipahmek to Tapang! Cionaw, pipahmek to Kawas iso!

¹³ Cingra ko patanektekay to 'adawang no niyaro' iso, Cingra ko palmeday to wawa iso.

¹⁴ O misimaway Cingra to salawacan no kitakit iso a parihaday, o sanga'ayay a ^mi ko sapafcol Ningra i tisowanan.

¹⁵ Palimo'ot han Ningra ko hkal i, tangsol a matnak ko sowal Ningra.

¹⁶ Tfaden Ningra ko matiyaay o fanoh no siri a kohcal a so^da, fasfasen Ningra a matiya o 'afo ko malaso^daay a 'o'ol.

¹⁷ Folsaken Ningra a matiya o si'lac ko masa'ika'ikayay a so^da, awaay ko pakahadidiay to niiyofan Ningra a pasadak a si^naw.

¹⁸ Palimo'ot han Ningra i, laso'or saan ko so^da, iyof han Ningra i, rakat sato ko nanom.

¹⁹ Paratohen Ningra ci Yakop to sowal Ningra, paratohen Ningra ko Israil to sifana' ato rikec Ningra.

²⁰ Nikawrira, caay pihaen Cingra to romaroma a kitakit, saka, caay ka fana' cangra to rikec Ningra. Haliluya!