'Olic 146 - 阿美語聖經-新約附詩篇箴言

O Pipahmek to Pa'oripay a Kawas

¹ Haliluya! 'Adingoaw ako, pipahmek kiso to Tapang!

² I tini i nika 'oripho ako i, o papahmek kako to Tapang, tahatolas no 'orip ako a romadiw a pahmek kako to Kawas ako.

³ Aka piti'er kamo to no i hkalay a kakridan, aka pipaso'lin to mamapohed a tamdaw, caay ko papakapa'orip cingra i tamowanan.

⁴ Ano mapatay cangra i, minokay i sra, o mamalahdawto itiya toya romi'ad ko nisahalakaan nangra.

⁵ O mapadamaay no Kawas ni Yakop a tamdaw i, tada o malmeday, o miti'eray a tamdaw to Tapang a Kawas ningra i, tada o malmeday.

⁶ O nisanga'an no Kawas ko kakarayan ato sra ato riyar ato i laloma'ay nonini a maamaan a ma^min, mado^do Ningra ko niktonan Ningra a sowal a tahada'oc.

⁷ Mipa'ading Cingra to mo^cel i masamsamay a tamdaw, paflien Ningra to kakaenen ko macahiway a tamdaw. Tdalen no Tapang ko mapalitay a tamdaw a mipakonira,

⁸ papipaka'arawen no Tapang ko mata no mapohaway a tamdaw, padamaen no Tapang a palowad ko masamsamay a tamdaw, o kaolahan no Tapang ko mo^celay a tamdaw.

⁹ Dipoten no Tapang ko pacarcaray a maro' a roma a finacadan, padamaen Ningra ko pakoyoc a wawa ato maponengay, nikawrira, palasawaden Ningra ko nisahalakaan no tatiihay a tamdaw.

¹⁰ O mamida'oc a malahongti ko Tapang. Cionaw, o mamida'oc a mikowan ko Kawas namo. Haliluya!