'Olic 144 - 阿美語聖經-新約附詩篇箴言

O Pikansiya no Hongti to Nipipakalowid

O 'olic ni Tafiti.

¹ Nanay mapahmek ko Tapang o 'ongcoy ako, pananamen Ningra kako to sakafana' a milood, pasifana'en Ningra kako to sakasarocod a milood.

² O 'icel ako Cingra, o pisitaraan ako, o pilimekan ako, o pa'oripay i takowanan, o piti'eran ako Cingra, pasayra kako i Cingraan a milongoc to pipa'ading. Cingra ko papihaklongay to kasakitakit i takowanan.

³ Tapangaw, o sapimaan ko tamdaw iro haratengen Iso cingra? O sapimaan ko mamapohed a tamdaw iro dipoten Iso cingra?

⁴ Matiya o ccay a sla' ko tamdaw, matiya o mitafsiway a lidong no to'em ko 'orip ningra.

⁵ Tapangaw, nanay fohaten Iso ko kakarayan a ma^pod a tayni, nanay tfingen Iso ko tokotokos ta masadak ko 'acfel.

⁶ Nanay pasadaken Iso ko fitili' a paliwasak to 'ada, nanay pa^feren Iso ko pana' ta milaliw cangra.

⁷ Nanay laya'en ko kamay Iso nai kakarayan a pa'orip i takowanan, pa'oripen kako a pasadak nai talolongay a nanom, pa'oripen kako a paliyas nai papotalay a ci'icelay a 'ada.

⁸ Awaay ko so'linay a sowal nangra, haloniktonan nangra a sowal a o mangah.

⁹ Kawasaw, patngilen ako Kiso to fa^lohay a radiw, pasonien ako ko datok a pahmek i Tisowanan.

¹⁰ Kiso ko saka pakalowid no hongtingti, mapa'orip Iso ci Tafiti o matayalay Iso.

¹¹ Nanay pa'oripen Iso kako a paliyas nai miforiforay a 'ada, pa'oripen kako a paliyas nai papotalay a ci'icelay a 'ada. Awaay ko so'linay a sowal nangra, haloniktonan nangra a sowal a o mangah.

¹² Nanay matiya o tanektekay ko lahad a kilang ko nika lakapah no wawa niyam, nanay matiya o nito^to'an a hcek a saka^res no loma' no hongti ko nika kapah no kaying a wawa niyam.

¹³ Nanay matomes ko 'ariri niyam to masamaamaanay a kinaira, nanay malnak ko masaflaway a nipakaenan niyam a siri.

¹⁴ Nanay malnak ko pina'orip niyam a 'aloman, nanay awaay ko mahalodotay ko hofoc a kolong ato sipon niyam. Nanay awaay a matngil i niyaro' niyam ko tangic no tamdaw.

¹⁵ O matiniay ko 'orip a kitakit i, tada o malmeday. O mangodoay to Tapang a palaKawas a finawlan i, tada o malmeday.