'Olic 143 - 阿美語聖經-新約附詩篇箴言

O Pitolon a Milongoc to Pipadama

O 'olic ni Tafiti.

¹ Tapangaw, nanay tngilenho Iso ko pitolon ako! Nanay tngilenho Iso ko pitahidang ako a mingitangit i Tisowanan! O so'linay Kiso, nanay paca'ofen Iso kako, o mo^celay Kiso, nanay paca'ofen Iso kako.

² Nanay caay pisawkit Kiso i takowanan o matayalay Iso, nawhani awaay ko caay ka ciraraw a tamdaw i ka'ayaw Iso.

³ Mikari'ang ko 'ada ako i takowanan, lowiden ningra kako. Rofoen ningra kako i to'manay a pirofoan, matiyato o halafinayto a mapatayay a tamdaw kako.

⁴ Saka, awaayto ko pafaloco'an ako, matoledto a mararom ko faloco' ako.

⁵ Miharateng kako to iti:yaayho a dmak, miharateng kako to nidmakan Iso a ma^min, misaharaterateng kako to polong no nidmakan Iso a maamaan.

⁶ Pasayra kako i Tisowanan a pakamay a mitolon, mangalay kako i Tisowanan, matiyato o makdalay a sra a mangalay to 'orad ko faloco' ako.

⁷ Tapangaw, nanay kalamkamen Iso a paca'of kako, awaayto ko pafaloco'an ako. Nanay caay piliyas Kiso a misatalifokil i takowanan, ano haenen Iso i, matiyato oya matfaday i patay a tamdaw kako.

⁸ Nanay papiharatengen kako to romi'ami'ad toya caay ka falic a olah Iso, nawhani o miti'eray kako i Tisowanan. Nanay pahapinangen kako to rarakaten ako a lalan, nawhani o kacifaloco'an ako Kiso.

⁹ Tapangaw, milongoc kako to pipa'ading Iso i takowanan, nanay pa'oripen Iso kako a paliyas nai 'ada ako.

¹⁰ O Kawas ako Kiso, nanay pasifana'en kako a maolah a mido^do to nafaloco'an Iso. Tadanga'ayay ko 'Adingo Iso, nanay kriden kako a parakat to marayasay a lalan.

¹¹ Tapangaw, nanay do^doen Iso ko niktonan Iso a sowal a mipa'orip i takowanan, o mo^celay Kiso, nanay pa'oripen Iso kako a paliyas nai pades.

¹² Tona caay ka falic ko olah Iso i takowanan saka, nanay palasawaden Iso ko 'ada ako. Nanay tkopen Iso a ma^min koya misamsamay i takowanan a tamdaw, nawhani o matayalay Iso a tamdaw kako.