'Olic 141 - 阿美語聖經-新約附詩篇箴言

O Pitolon to Dadaya

O 'olic ni Tafiti.

¹ Tapangaw, milongoc kako i Tisowanan, nanay kalamkam Kiso a mipadama i takowanan. Ano mitahidang kako a milongoc i, nanay tngilen Iso.

² Nanay matiya o 'acfel no ^xiw a macakat i ka'ayaw Iso ko pitolon ako, nanay malasapato'aya to dadaya ko pipakamay ako a mitolon.

³ Tapangaw, nanay 'meten Iso ko ngoyos ako, nanay sooten Iso ko ngoyos ako.

⁴ Nanay fo'oten Iso kako to saka^caaw ka pasayra no faloco' ako i tatiihay a dmak, ta caay ka pikapot kako to tatiihay a tamdaw a mapaacek, nanay caay papikihatiyaen Iso kako i cangraan a mitahka.

⁵ Mangalay kako a milayap to sida'itay a pisti' no mo^celay a tamdaw, caay ka ngalay kako to nika ngodo no tatiihay a tamdaw i takowanan, nawhani mararid kako i pitolon ako a pacoli to tatiihay a dmak nangra.

⁶ Ano mafahkolto i 'ongcongcoyan ko kakridan nangra i, itiyato a mafana' ko finawlan to nika o so'linay ko sowal ako.

⁷ O mamafalah ko 'okak nangra a malaklak i tatihi no tadem, samatiya sato o malaklakay a niltekan a kilang.

⁸ Nikawrira, o Isatakaraway a Tapang, oyananto a miti'er kako i Tisowanan, milongoc kako to pidipot Iso, nanay caay pifalah Kiso i takowanan.

⁹ Nanay caay ka tfaden Iso kako i nitlayan nangra a tilo, pa'oripen kako a paliyas nai pisafana' no tatiihay a tamdaw.

¹⁰ Mamana cangra ko tahatiloay i nitlayan nangra a tilo, ta mapaliyas kako a maparihaday.