'Olic 139 - 阿美語聖經-新約附詩篇箴言

O Masongila'ay ko Fana' ato Pidipot no Kawas

O 'olic ni Tafiti. Mapatorod i kakridan no paradiway.

¹ Tapangaw, masapsapto Iso ko faloco' ako, mafana'to Kiso i takowanan.

² Mafana' Kiso to wakawak ako, yo i raayho i, mafana'to Kiso to niharatengan ako.

³ Ano matayal, ano pahanhan kako i, ma'arawto Iso kako, mafana' Kiso to nidmakan ako a ma^min.

⁴ Tapangaw, caho ka pasowal kako i, mafana'to Kiso to sasowalen ako.

⁵ Ira Kiso i tatihi ako a misimaw, madipot no 'icel Iso kako.

⁶ Talolong ko nika fana' Iso i takowanan saka, fahka' kako, caayto ko mamafilo ako a miharateng.

⁷ Talacowa kako ta malimek ako ko 'Adingo Iso saw? Talacowa kako ta malaliw ako ko pising Iso saw?

⁸ Ano tayra kako i kakarayan i, ira Kiso itira, ano tayra kako i kaitiraan no mapatayay i, ira Kiso itira.

⁹ Ano ma^fe^fer kako a tayra i kasadakan no cidal i kawali, ano ^ca i, maro' i ka^tip i co'ed no riyar i,

¹⁰ wa ira Kiso itira a mikrid i takowanan, o mamikayat Kiso i takowanan itira.

¹¹ Manga'ay kako a milongoc to to'man a papitahpo i takowanan, ano ^ca milongoc to ta^ngad a maladadaya,

¹² nikawrira, caay ka matira ko pinengneng Iso, o to'man i, caay ka to'man, o dadaya ato romi'ad i, malcadayto a ta^ngad. O to'man ato ta^ngad i, malcadayto ko pinengneng Iso.

¹³ O kmod no tireng ako i, Kiso ko misanga'ay, i tiyad no ina ako a mipakakafit Kiso i takowanan.

¹⁴ Mipahmek kako i Tisowanan, nawhani o kakafahka'an, o kakangodoan ko pisanga' Iso i takowanan, o kafahka'an ko dmak Iso, mafana' ko faloco' ako tonini.

¹⁵ I tiyaday no ina kako a masanga', malahad kako a masimed i laloma', ano masamaan ko kasafaco no 'okak ako i, mafana' Kiso a ma^min.

¹⁶ Yo caho ka hofoc kako i, ma'arawto Iso kako, maharekto Kiso a mitilid i cudad Iso to aira a dmak ato romi'ad ako.

¹⁷ Kawasaw, wata: ko nika talolong no harateng Iso, caay ko mamafilo a misa'osi ko niharatengan Iso.

¹⁸ Ano haccayen ako a misa'osi i, ikaka no adihay no tafok no riyar. Yo mapalal kako i, o mikapotay kako i Tisowanan.

¹⁹ Kawasaw, nanay patayen Iso ko tatiihay a tamdaw, nanay paliyasen Iso ko mari'angay a tamdaw i takowanan.

²⁰ Nawhani sowal saho cangra i, milokes cangra i Tisowanan, sahto o tatiihay ko sowal nangra a milikaf i Tisowanan.

²¹ Tapangaw, wata: ko nika 'intel ako to mi'intelay i Tisowanan. Tadama'osi kako to pacoliay i Tisowanan a tamdaw.

²² Kelkel sa ko tlii ako i cangraan, sa'ada hanto ako cangra.

²³ Kawasaw, nanay hapinangen Iso ko faloco' ako, kafana' to harateng ako, nanay lifeten Iso kako, sapsapen ko faloco' ako.

²⁴ Nanay nengnengen Iso kako ano iraho ko maan a tatiihay a faloco' ako, nanay kriden Iso kako a romakat i lalan no mida'ocay a 'orip.