'Olic 136 - 阿美語聖經-新約附詩篇箴言

O Sapikansiya a Radiw

¹ Mikansiya kita to Tapang, nawhani o nga'ayay Cingra, o mida'ocay ko sini'ada Ningra.

² Mikansiya kita to Kawas no kawakawas, nawhani o mida'ocay ko sini'ada Ningra.

³ Mikansiya kita to Tapang no tapatapang, nawhani o mida'ocay ko sini'ada Ningra.

⁴ Dengan Cingra ko midmakay to kafahka'an, nawhani o mida'ocay ko sini'ada Ningra.

⁵ Pakaynien Ningra i taneng Ningra ko pisanga' to kakarayan, nawhani o mida'ocay ko sini'ada Ningra.

⁶ Claken Ningra ko sra i fafaed no talolongay a nanom, nawhani o mida'ocay ko sini'ada Ningra.

⁷ O nisanga'an Ningra ko cidal ato folad, nawhani o mida'ocay ko sini'ada Ningra.

⁸ Papikowanen Ningra ko cidal to romi'ad, nawhani o mida'ocay ko sini'ada Ningra.

⁹ Papikowanen Ningra ko folad ato fo'is to dadaya, nawhani o mida'ocay ko sini'ada Ningra.

¹⁰ Patayen Ningra ko fisac a wawa no Icip a tamdaw, nawhani o mida'ocay ko sini'ada Ningra.

¹¹ Kriden Ningra ko finawlan no Israil a pasadak nai Icip, nawhani o mida'ocay ko sini'ada Ningra.

¹² O ci'icelay a kamay ato patlaw Ningra ko sapikrid Ningra, nawhani o mida'ocay ko sini'ada Ningra.

¹³ Palicinowasen Ningra ko Kahngangay hananay a riyar, nawhani o mida'ocay ko sini'ada Ningra.

¹⁴ Kriden Ningra ko finawlan no Israil a pakayra a romakat, nawhani o mida'ocay ko sini'ada Ningra.

¹⁵ 'Alolen Ningra ko hongti no Icip ato sofitay ningra i Kahngangay hananay a riyar, nawhani o mida'ocay ko sini'ada Ningra.

¹⁶ Kriden Ningra ko finawlan Ningra a romakat i kohkohan, nawhani o mida'ocay ko sini'ada Ningra.

¹⁷ Patayen Ningra ko ci'icelay a hongtingti, nawhani o mida'ocay ko sini'ada Ningra.

¹⁸ Patayen Ningra ko cinganganay a hongtingti, nawhani o mida'ocay ko sini'ada Ningra.

¹⁹ Patayen Ningra ci Sihon a hongti no Amori, nawhani o mida'ocay ko sini'ada Ningra.

²⁰ Patayen Ningra ci Ok a hongti no Pasan, nawhani o mida'ocay ko sini'ada Ningra.

²¹ Paflien Ningra ko sra no tao i finawlan Ningra, nawhani o mida'ocay ko sini'ada Ningra.

²² Paflien Ningra tonini a sra ko matayalay Ningra a Israil, nawhani o mida'ocay ko sini'ada Ningra.

²³ Yo matfad kita i, caay pifalah Cingra i titaanan, nawhani o mida'ocay ko sini'ada Ningra.

²⁴ Pa'oripen Ningra kita a paliyas nai 'ada ita, nawhani o mida'ocay ko sini'ada Ningra.

²⁵ Paflien Ningra ko pina'orip ato tamdaw to kakaenen, nawhani o mida'ocay ko sini'ada Ningra.

²⁶ Mikansiya kita to Kawas i kakarayan, nawhani o mida'ocay ko sini'ada Ningra.