'Olic 135 - 阿美語聖經-新約附詩篇箴言

O Sapahmek a Radiw

¹ Haliluya! Kamo o matayalay no Tapang, pipahmek kamo to ngangan no Tapang.

² Kamo o matayalay i loma' no Tapang, o i laloma'ay no Fangcalay a Kaitiraan no Kawas ita a tamdaw,

³ pipahmek to Tapang, nawhani o nga'ayay Cingra, karomadiw a pahmek to ngangan Ningra, nawhani o sini'adaay Cingra.

⁴ O nipili'an no Tapang ci Yakop to maloningra, o nipili'an Ningra ko Israil a finawlan to maloningra.

⁵ Mafana' kako to nika tadamaan no Tapang, ikaka no kalokawakawas ko Tapang ita.

⁶ Ano i kakarayanto, ano i srato, ano i riyarto, ano i talolongayto i, o nafaloco'an no Tapang ko nilahcian Ningra a midmak.

⁷ Pacakaten Ningra nai sra ko canem a palato'em, pahaklongen Ningra to fitili' ko 'orad a mitfad, pasadaken Ningra ko fali nai 'ariri Ningra.

⁸ Itira i Icip i, patayen Ningra ko polong no fisac a wawa, ano tamdawto a fisac, ano pina'oripto a fisac i, patayen Ningra a ma^min.

⁹ Itira Cingra a midmak to ci'icelay a kafahka'an a dmak, tfocen Ningra ko hongti no Icip ato matayalay ningra a tapatapang.

¹⁰ Tkopen Ningra ko 'alomanay a kasakitakit, patayen Ningra ko ki^melay a hongtingti,

¹¹ ci Sihon a hongti no Amori, ci Ok a hongti no Pasan ato polong no i tiraay i Kanan a hongtingti.

¹² 'Afasen Ningra ko sra nangra a pafli i finawlan Ningra, paflien Ningra ko Israil a finawlan to maloomah nangra.

¹³ Tapangaw, o mamida'oc ko ngangan Iso, o mamaharateng no kasarayray no tamdamdaw Kiso.

¹⁴ O mamipa'ading ko Tapang to finawlan Ningra, o a adayay Cingra to polong no matayalay Ningra.

¹⁵ O samiyay no kasakitakit i, o nifowahan to tada^kim ato ^kim, o nito^to'an no kamay no tamdaw a misafaco a misanga'.

¹⁶ Ira ko ngoyos nanira i, caay ka caciyaw, ira ko mata nanira i, caay pakanengneng,

¹⁷ ira ko tangila nanira i, caay pakatngil, awaay ko sasla'an no ngoyos nanira.

¹⁸ Mamana matiya o nisanga'an nangra a samiyay ko polong no misanga'ay ato paso'linay tonini.

¹⁹ Kita o Israil a tamdaw, pipahmek to Tapang! Kamo o paro no loma' ni Aron a citodongay to ta'ong, pipahmek i Cingraan!

²⁰ Kamo o Lifi a tamdaw, pipahmek to Tapang! Kita o polong no mangodoay to Tapang a tamdaw, pipahmek i Cingraan!

²¹ Pipahmek to Tapang i Cion, pipahmek to maro'ay i Yirusalim a Tapang! Haliluya!