'Olic 118 - 阿美語聖經-新約附詩篇箴言

O Pikansiya a Mitolon to nika Pakalowid

¹ Pikansiya kamo to Tapang, nawhani, o nga'ayay Cingra, o mida'ocay ko sini'ada Ningra.

² Nanay pasowal ko Israil a tamdaw, <> saan.

³ Nanay pasowal ko paro no loma' ni Aron o citodongay to ta'ong, <> han nangra.

⁴ Nanay pasowal ko polong no mangodoay to Tapang a tamdaw, <> saan.

⁵ Yo mapades kako i, milongoc kako to Tapang, paca'ofen Ningra kako, tdalen Ningra kako.

⁶ Mikapot ko Tapang i takowanan saka, caayto ka talaw kako. Pakapimaan ko tamdaw i takowanan saw?

⁷ O Tapang ko mipadamaay i takowanan, o mama'araw ako ko nika lowid no 'ada ako.

⁸ O piti'er to Tapang ko nga'ay to nipiti'er to tamdaw.

⁹ O piti'er to Tapang ko nga'ay to nipiti'er to hongti i hkal.

¹⁰ Malikot no 'alomanay a 'ada kako, nikawrira, o pitadi'ec ako to 'icel no Tapang ko sapitkop ako i cangraan.

¹¹ Malikot nangra kako, nikawrira, o pitadi'ec ako to 'icel no Tapang ko sapitkop ako i cangraan.

¹² Matiya o nika safreng no 'odal ko nipilikot nangra i takowanan, nikawrira, matiya o pitodoh no namal to fadal a ccay a mlet ko nika todoh nangra, pakaynien ako i 'icel no Tapang ko sapitkop i cangraan.

¹³ Kari'angen nangra kako a mipolin, nikawrira, padamaen no Tapang kako.

¹⁴ O 'icel ako ko Tapang, o 'olic a radiw ako Cingra, o pa'oripay Cingra i takowanan.

¹⁵ Cilodihang ko kopang a talo'an no finawlan no Kawas to nipilkal nangra tona pakalowid, <

¹⁶ O 'icel no Tapang ko sakapakalowid ita! Mipatalahkal ko Tapang to tadamaanay a 'icel Ningra!>> saan.

¹⁷ Caay ko mamapatay kako, o mama'oripho kako, o papalosiyang kako to nidmakan no Tapang.

¹⁸ O nao mitfocanto no Tapang kako to kartengay, nikawrira, caay patayen Ningra kako.

¹⁹ Fawahen Ningra ko 'adawang no Fangcalay Pita'ongan, micomod kako a pahmek to Tapang.

²⁰ Onini a 'adawang i, o 'adawang no Tapang, deng o mo^celay a tamdaw ko mamicomod.

²¹ Tapangaw, mipahmek kako i Tisowanan, nawhani mipaca'of Kiso i takowanan saka, pakalowid kako.

²² O kinafalah no sayho a fokloh i, malakakalimlaanto a ta'enengan a fokloh.

²³ O nidmakan no Tapang konini, wata: o tadakafahka'an i mata niyam a nengnengen!

²⁴ O pakalowidan no Tapang konini a romi'ad, saka, kalipahak kita a mahmek.

²⁵ Tapangaw, nanay pa'oripenho Iso kami. Tapangaw, nanay palahcienho Iso ko dmak niyam.

²⁶ Nanay mapalmed no Kawas koya maocoray pakayni i ngangan no Tapang. Nai Fangcalay Pita'ongan to Tapang kami a mipalmed i tamowanan.

²⁷ O Kawas ko Tapang, o mipa'dilay Cingra i titaanan. Kapitatoy to ca'ang no kilang misatapangto kita a misalisin, pitaliyok to pipato'ayaan a romakat.

²⁸ O Kawas ako Kiso, mikansiya kako i Tisowanan, Kawasaw ako, o papalosiyang kako to nika tadamaan Iso.

²⁹ Pikansiya to Tapang, nawhani o nga'ayay Cingra, o mida'ocay ko sini'ada Ningra.