'Olic 112 - 阿美語聖經-新約附詩篇箴言

O Lipahak no Mo^celay a Tamdaw

¹ Haliluya! O tadamalmeday ko mita'ongay to Tapang, oya maolahay a mido^do to limo'ot Ningra a tamdaw.

² O mamalmed ko tloc no mo^celay a tamdaw, o mamacakat ko 'orip no tlotloc ningra i hkal.

³ O cacidafong ko loma' ningra, o mamida'oc ko mo^celay a dmak ningra.

⁴ Matiya o likat cingra a patdi to mo^celay a tamdaw i to'manay, nawhani o sini'adaay, o adayayay, o mo^celay cingra.

⁵ O halipalada'ay a tamdaw i, o malmeday, nawhani o so'linay ko dmak ningra a matayal.

⁶ Caay ko mamatfad ko mo^celay a tamdaw, o mamida'oc a maharateng no tamdaw cingra.

⁷ Caay ka talaw cingra to tatiihay a ratoh, tanektek ko paso'lin no faloco' ningra, masarocod ko faloco' ningra a miti'er to Tapang.

⁸ Caay ka rawraw, caay ka talaw cingra, caay ka ^ca o mama'araw ako ko nika tfad no 'ada saan ko paso'lin ningra.

⁹ O halipalada'ay ato halipadamaay cingra to pakosiya a tamdaw, mida'oc ko mo^celay a dmak ningra. O mamacakat ko 'orip ningra a makangodo no tamdaw.

¹⁰ Minengneng ko tatiihay a tamdaw to nika cakat no mo^celay a tamdaw i, matlii cangra, mingric cangra to wadis a makter ta matkop, malasawadto ko pafaloco'an nangra.