'Olic 109 - 阿美語聖經-新約附詩篇箴言

O Ngaliwngiw no Mapadesay a Tamdaw

O 'olic ni Tafiti. Mapatorod i kakridan no paradiway.

¹ O nipahmekan ako a Kawas, nanay caay ka tomrep Kiso.

² Mikari'ang i takowanan ko tatiihay ato misa'fitay a tamdaw, misamangah cangra a milokes a pasowal to pakayniay i takowanan.

³ Tada o tatiihay ko sowal nangra to pakayniay i takowanan a padoka' to faloco' ako, padteng sa cangra a mikari'ang i takowanan.

⁴ Talacowa maolah kako i cangraan, mitolon kako to saki cangraan, nikawrira, pacoli cangra i takowanan.

⁵ O tatiihay ko sapaco'ay nangra to nga'ayay a dmak ako, o 'intel ko sapaco'ay nangra to olah ako.

⁶ Mamana o tatiihay a tamdaw ko papisawkiten Iso to 'ada ako, ka o 'ada nangra ko pakokotay i cangraan.

⁷ Mamana masawkit cingra a mapastek i raraw, mamana halopitolon ningra a mapastek i raraw.

⁸ Mamana mamoko' ko 'orip ningra, mamana ma'afas no tao ko kamaro'an ningra.

⁹ Mamana malapakoyoc ko wawa ningra, mamana maponeng ko fafahi ningra.

¹⁰ Mamana malamiki'a'amay ko wawa ningra a awaay ko loma' nangra, mamana malaplap cangra nai matastasay a loma' nangra.

¹¹ Mamana maala no militadahay ko dafong ningra a ma^min, mamana ma'afas no tao ko nikarorayan ningra a ma^min.

¹² Mamana awaay ko sida'itay i cingraan, mamana awaay ko adayayay to nika lapakoyoc no wawa ningra.

¹³ Mamana malasawad ko tloc ningra, mamana awaayto ko mamirocok to ngangan ningra.

¹⁴ Mamana maharateng no Tapang ko raraw no tato'asan ningra, mamana maharateng Ningra ko raraw no wina ningra.

¹⁵ Mamana tahada'oc a maharateng no Tapang ko raraw nangra, mamana awaayto a maharaterateng cangra i tini i hkal.

¹⁶ Nawhani o sasida'itho cingra to tamdaw, sahto o pisamsam to pakosiya a tamdaw ato pikari'ang a mipatay to awaay ko palawinaan a tamdaw ko dmak ningra.

¹⁷ Maolah cingra a mi'kak saka, mamana ma'kak cingra, caay ka olah cingra a palmed saka, mamana miliyas ko sapalmed i cingraan.

¹⁸ Matiya o nipica'dong ningra to riko' a caloway ko nipi'kak ningra to tamdaw, saka, mamana matiya o nipircep no nanom ko nipircep no lafo i cingraan, mamana matiya o nipircep no simal a tangasa i 'okak ko nipircep no lafo i cingraan.

¹⁹ Mamana matiya o nipitafo no riko' to tireng ningra ko nipitafo no lafo i cingraan, mamana matiya o nipikdec no safaked to tatlecan ko nipikdec no lafo i cingraan.

²⁰ Mamana haenen Iso Tapang ko pitfoc to 'ada ako, mamana co'ayen Iso koya milokesay a mikari'ang i takowanan a tamdaw.

²¹ Nikawrira, o Isatakaraway a Tapang, nanay do^doen Iso ko niktonan Iso a sowal a mipadama i takowanan, nawhani pakaynien Iso i sini'ada ato nika nga'ay Iso ko pipa'orip i takowanan.

²² Nawhani o pakosiya, o marorayay kako, tada o mararomay ko faloco' ako.

²³ Matiya o lidong i picleman no cidal a sakalahdawan kako, matiya o ccay a malaplapay a riri' kako.

²⁴ Tona misaliway kako saka, salomaing sato ko tosor ako, mangiriwto a tadanca ko tireng ako.

²⁵ O minengnengay i takowanan a tamdaw i, milokes a ma^min, 'inga'ing sa cangra to fongoh a matawa i takowanan.

²⁶ Tapang a Kawas ako, nanay padamaenho kako, nawhani caay ka falic ko olah Iso, nanay pa'oripenho kako.

²⁷ Ta mafana' ko 'ada ako to nika o pa'oripay Kiso i takowanan.

²⁸ Ano mi'ka'kak cangra i takowanan, nikawrira, o papalmeden Iso kako, mamana tfaden Iso a pakangodo koya mikari'angay i takowanan, nikawrira, o lalipahak ko matayalay Iso.

²⁹ Mamana mapakangodo ko 'ada ako, mamana kalakafafang han nangra ko ngodo.

³⁰ Milkal kako a mikansiya to Tapang, o raromadiw kako a pahmek i Cingraan i kasa'opoan no finawlan,

³¹ nawhani o pa'adingay Cingra to pakosiya a tamdaw, o pa'oripay Cingra a paliyas nai mipastekay cingraan i patay a tamdaw.