'Olic 106 - 阿美語聖經-新約附詩篇箴言

O Sida'it no Kawas to Finawlan

¹ Haliluya! Pikansiya to Tapang, nawhani o nga'ayay Cingra, o mida'ocay ko sini'ada Ningra.

² Cima ko mama^deng a pasowal to tadamaanay a nidmakan no Tapang? Cima ko mama^deng a patalahkal a pahmek to polong no nga'ayay a dmak Ningra?

³ O ma'imeray a tamdaw to limo'ot Ningra i, o tadamalmeday. O marariday a o mo^celay ko dmak a tamdaw i, o tadamalmeday.

⁴ Tapangaw, ano mipalmed Kiso to finawlan Iso i, nanay haratengen Iso kako, pa'oripen kako.

⁵ Nanay pa'arawen Iso kako to nika cakat no 'orip no nipili'an Iso a finawlan, papikihatiyaen kako a lipahak to lipahak no finawlan Iso, ato kalita'angan no Miso a finawlan.

⁶ Malcad kita to tato'asan ita a ciraraw a ma^min, o ci'iloay o tatiihay ko dmak ita a ma^min.

⁷ Yo i Icipho ko tato'asan ita i, caay ka fana' cangra to kafahka'an a dmak no Kawas, talacowa kinapinapi:nato ko Kawas a patiri' to sini'ada Ningra i cangraan i, caho ka harateng nangra, pacoli cangra i Kahngangay hananay a riyar to Ci'icelay a Kawas.

⁸ Nikawrira, o sapatalahkalaw no Kawas to tadamaanay a 'icel Ningra saka, do^do han Ningra ko niktonan Ningra a sowal a pa'orip i cangraan.

⁹ Palimo'ot han Ningra ko Kahngangay hananay a riyar i, tangsol sa a ma'icang, krid hanto Ningra ko finawlan a romakat a milacal, matiyasa o romakatay i hadhad cangra.

¹⁰ Pa'oripen Ningra cangra a paliyas nai mi'intelay i cangraan, pa'oripen Ningra cangra a pasadak nai 'ada nangra.

¹¹ Nikawrira, 'alolen no riyar koya 'ada nangra, awaayto ko ccaccay aca a fadoc nangra.

¹² Itiya i, paso'lin sato ko finawlan to sowal no Tapang, pahmek sato cangra a romadiw i Cingraan.

¹³ Nikawrira, ranikay a matawal nangra ko nidmakan no Tapang, caay ka sapitalaan cangra to faloco' Ningra.

¹⁴ Yo i kohkohan cangra i, lomowad ko 'anof nangra, mingitangit a milifet to Kawas cangra.

¹⁵ Saka, do^do hanto no Kawas ko nilongocan nangra a mipafli i cangraan, nikawrira, halolifong a adada a tfaden Ningra i cangraan.

¹⁶ Yo i talo'an cangra i kohkohan i, ma'inap cangra ci Mosian, ngaliwngiw cangra ci Aronan o fangcalay a matayalay no Tapang.

¹⁷ Itiya i, mapla' ko sra, ta'moden no sra ci Tatan, matadem no sra ci Apiram ato paro no loma' ningra.

¹⁸ Ira ko namal a matfad i tireng no kapot nangra, matodoh no namal koya tatiihay a tamdaw a milanto.

¹⁹ Misanga' cangra to faco no ^kim a kolong i Horip a lotok, mipitosor cangra a mita'ong to nisanga'an no kamay a samiyay.

²⁰ Patisoden nangra to faco no komaenay to rngos a kolong ko tadamaanay a Kawas.

²¹ Matawalto nangra koya pa'oripay i cangraan a Kawas, matawalto nangra koya tadamaanay a dmak Ningra i Icip

²² ato nidmakan Ningra i Ham a kafahka'an a dmak, atoya nidmakan Ningra i Kahngangay hananay a riyar a katalawan no tamdaw a dmak Ningra.

²³ Nikawrira, yo pasowal ko Kawas to sapitkopaw to finawlan Ningra i, sa'icel sa ci Mosi a mingitangit o nipili'an Ningra a matayalay to saka^caaw ka kter Ningra, saka, malasawad ko sakatkopaw no finawlan no Israil.

²⁴ Mi^pec cangra toya makapahay a sra, caay paso'lin cangra to niktonan no Kawas a sowal.

²⁵ Ngaliwngiw cangra i laloma' no kopang, caay ka sapitngilan cangra a mido^do to sowal no Tapang.

²⁶ Onini ko saka, ca^des ko sowal no Tapang i cangraan, o mamapatay cangra i kohkohan,

²⁷ o mamaliwasak ko wawawawa nangra i kasakitakit, o a itira cangra i roma a kitakit a mapatay, han Ningra.

²⁸ Nanoya, mita'ong ko finawlan no Kawas to Paal i Pior, komaen cangra to nipacakatan i mapatayay a kawas a sapato'aya.

²⁹ O nano dmak nangra ko sakakter no Kawas i cangraan, saka, fahal sa ira i cangraan ko lifong a adada.

³⁰ Nikawrira, tireng sa ci Finihas a mitfoc to ciraraway a tamdaw, saka, trep sato koya lifong a adada.

³¹ O nga'ayay konini a dmak saan ko piharateng no tamdaw, saka, nai tiya tangasa i da'oc no rayray a maharateng konini.

³² Pakakteren haca no finawlan ko Tapang i tatihi no Miripa a nemnem, saka, halo ci Mosi a mapakaroray to nano dmak nangra.

³³ Tona tadamapakaroray nangra ci Mosi saka, pasowal sato cingra to caay ko sasowalen a sowal.

³⁴ Miliyang cangra to limo'ot no Tapang, caay pipatay cangra toya roma a finacadan.

³⁵ Kalararamod han nangra cangra, mitodong cangra to pinangan nangra.

³⁶ Mita'ong to samiyay ko finawlan no Kawas, o sakatkop nangra konini.

³⁷ Kalasapato'aya han nangra ko wawa nangra i palafoay a kawas no Kanan.

³⁸ Patayen nangra ko awaay ko raraw a tamdaw, patayen nangra ko wawa nangra a pato'aya i samiyay no Kanan, saka, mapaacek no rmes no nipatayan konini a pala.

³⁹ Onini a dmak ko saka mapaacek cangra, o miliyasay o ma'odangay cangra i ka'ayaw no Kawas.

⁴⁰ Saka, makter ko Tapang to finawlan Ningra, ma'osi Cingra i cangraan.

⁴¹ Falah hanto Ningra cangra a patorod i roma a finacadan, saka, makowanto no 'ada cangra.

⁴² Masamsam no 'ada cangra, caayto ka pakonira cangra.

⁴³ Kinapinapi:nato ko Tapang a pa'orip to finawlan Ningra i, paci^ci sa cangra a pacoli to Tapang, saka, matfad cangra i talolongay a raraw.

⁴⁴ Nikawrira, yo mingitangit cangra a mitahidang to Tapang i, tngilen Ningra, sikolen Ningra ko pades nangra.

⁴⁵ Nawhani maharateng no Tapang ko nikatatlekan Ningra, o nano sini'ada Ningra saka, masasiyor ko faloco' Ningra.

⁴⁶ Saka, papisaadayayen Ningra ko mirofoay i cangraan a 'ada.

⁴⁷ Tapang a Kawas niyam, nanay pa'oripenho Iso kami, nanay panokayen Iso kami nai kasakitakit, ta manga'ay kami a pahmek to fangcalay a ngangan Iso, ta o saka cihrang niyam ko pikansiya i Tisowanan.

⁴⁸ Nanay mapahmek ko Tapang a Kawas no Israil a tahada'oc. Nanay malcad ko kasafinawlan a pangiha' a somowal to, <> sanay. Haliluya!