'Olic 105 - 阿美語聖經-新約附詩篇箴言

O Kawas ato Finawlan Ningra

¹ Pikansiya kamo to Tapang, Palosiyangen ko nika tadamaan Ningra. Pasowalen i kasakitakit ko nidmakan Ningra.

² Karomadiw kamo a pahmek i Cingraan, pasowalen a ma^min ko kafahka'an a dmak Ningra.

³ Kacihrang kamo to fangcalay a ngangan Ningra. Nanay malipahak a ma^min ko milongocay to Tapang.

⁴ Pilongoc i Tapang to pipadama Ningra, kararid a mita'ong i Cingraan.

^5-6 Kamo o tloc ni Apraham o matayalay no Kawas, kamo o tloc ni Yakop o nipili'an Ningra, haratengen namo ko nidmakan Ningra, haratengen ko polong no nilahcian Ningra a misawkit.

⁷ O Tapang Cingra, o Kawas ita, maldef i polong no hkal ko pikowan Ningra.

⁸ Tahada'oc ko pido^do Ningra to katatlekan Ningra, tahada'oda'oc ko niktonan Ningra a sowal.

⁹ Do^doen Ningra ko nikatatlekan Ningra aci Apraham, do^doen Ningra ko niktonan Ningra a sowal ci Isakan.

¹⁰ O mida'ocay ko niktonan Ningra ci Yakopan a sowal, o mida'ocay ko nikatatlekan no Tapang ato Israil.

¹¹ Sowal sa Cingra <> sanay.

¹² Yo caay ka 'aloman ko finawlan no Kawas i, itira cangra i Kanan a pacarcar a maro'.

¹³ Salinalinah sa ko aro' nangra, nai itira a pala tayra i roma a pala, nai itira a kitakit mafolaw cangra a tayra i roma a kitakit.

¹⁴ Nikawrira, caay pihayda ko Kawas to pisamsam no cimacima a tamdaw i cangraan, o sapa'adingaw no Kawas i cangraan saka, pasowalen Ningra ko hongtingti,

¹⁵ <> han Ningra.

¹⁶ Pakdalen no Tapang ko kitakit nangra, saka, awaayto ko kakaenen nangra.

¹⁷ Nikawrira, ocoren Ningra ci Yosif a pai'ayaw a mipatala to saki cangraan, saka, mapacakay ci Yosif a malakoli.

¹⁸ Mapalit to lonayi' ko tosa a wa'ay ningra, mapaca'dong ko li'el ningra to marad a sapalit,

¹⁹ mahaenay ko pilifet no Tapang cingraan tangasa i kalahcian no nipali'ayawan Ningra a sowal. O pahapinang no Tapang konini to nika so'lin Ningra.

²⁰ Saka, palimo'oten no hongti no Icip a papitdal a pakonira cingra, tdal hanto no mikowanay to kasakitakit a hongti cingra.

²¹ Maocor cingra a mapatorod a mikowan to dmak no kitakit, saka mikowan cingra to polong no kitakit.

²² Mapatorod no hongti cingra a papikowan to kasatapatapang, paflien no hongti cingra to sakowan a mikrid to kalokalas no kitakit.

²³ Nanoya, tayrato ci Yakop i Icip a pacarcar a maro' itira.

²⁴ Palnaken no Tapang ko finawlan Ningra, saka, ikakato no 'ada ko nika ci'icel nangra.

²⁵ Papi'intelen no Tapang ko Icip a tamdaw to finawlan Ningra, papisafana'en Ningra cangra to matayalay Ningra.

²⁶ Itiya i, ocoren no Tapang ko matayalay Ningra ci Mosi, ocoren haca Ningra ko nipili'an Ningra a tamdaw ci Aron.

²⁷ Itira cangra i Icip a pahapinang to tadamaanay a kafahka'an a dmak no Kawas.

²⁸ Sato'manen no Kawas koya pala, nikawrira, caay pitngil ko Icip a tamdaw to limo'ot Ningra.

²⁹ Palarmesen Ningra ko nanom no 'alo no Icip, mapatayto a ma^min ko foting.

³⁰ Papirsapen Ningra ko takora' i polong no kitakit nangra, halokafoti'an no hongti a loma' a maldef no takora'.

³¹ Palimo'ot han no Kawas ko lalangaw ato likes i, safrengan sa a tayni a mildef toya pala.

³² Sano'orad han Ningra a mitfad ko kasa'ika'ikay no so^da, tfaden haca Ningra ko fitili' a papiasik to polong no kitakit.

³³ Pelpelen Ningra ko fadisoso' ato sokon a kilang nangra, mapayak a ma^min ko kilang i laloma' no kitakit.

³⁴ Pasowal hanho Ningra ko riri' i, safrengan sa a tayni, caayto ko mamasa'osi ko nika adihay nanira.

³⁵ Korac han nanira a komaen ko polong no pinaloma.

³⁶ Patayen Ningra koya katanohtohho no tireng a sofocen a fisac a wawa no lomaloma' no Icip.

³⁷ Ta, kriden Ningra ko Israil a tamdaw a papihawikid to ^kim ato tada^kim a miliyas itira, awaay ko caay ka pakarakat a ngasaw nangra.

³⁸ Yo miliyas cangra i, salipahak sa ko Icip a tamdaw, nawhani matalaw cangra to Israil a tamdaw.

³⁹ O romi'ad i, claken no Tapang ko to'em a mipalidong to finawlan Ningra, o dadaya i, o likat no namal ko sapata^ngad Ningra i cangraan.

⁴⁰ Milongoc cangra i, pa^feren Ningra ko tikolac a patayra, tfaden Ningra nai kakarayan ko kakaenen nangra a pafcol.

⁴¹ Fohat han Ningra ko 'ongcoy i, powar sa a masadak ko nemnem, samatiya sato o 'alo ko ma'icangay a kohkohan.

⁴² O saka pihaen Ningra i, maharateng Ningra ko fangcalay a niktonan Ningra a sowal, o pilahci Ningra to niktonan Ningra a sowal ci Aprahaman o matayalay Ningra.

⁴³ Saka, krid hanto Ningra ko finawlan Ningra a lipahak a miliyas, milkal a romadiw a ma^min koya nipili'an Ningra a finawlan.

⁴⁴ Paflien Ningra cangra to sra no roma a finacadan, saka, tado sato cangra to omah no tao.

⁴⁵ Onini i, o papi'imer Ningra i cangraan to rikec Ningra a papido^do to limo'ot Ningra a ma^min. Haliluya!