'Olic 103 - 阿美語聖經-新約附詩篇箴言

O Sini'ada no Kawas

O 'olic ni Tafiti.

¹ 'Adingoaw ako, pipahmek to Tapang, sarocodaw ako ko faloco' ato tireng a pahmek to fangcalay a ngangan Ningra.

² 'Adingoaw ako, pipahmek to Tapang, aka ka pawan to sida'it Ningra.

³ O mihpolay Cingra to raraw ako a ma^min, o miadahay Cingra to adada ako a ma^min.

⁴ Pa'oripen Ningra kako a paliyas nai patay, o adayay ato sini'ada Ningra ko sapatamohong i takowanan.

⁵ Pakaynien Ningra i masamaamaanay a makapahay a maamaan ko saparahker Ningra i takowanan, saka, sako^ngel sa ko tireng ako a tanektek a matiya o 'alilis.

⁶ Mipa'ading ko Tapang to masamsamay a tamdaw, patalahkalen Ningra ko mo^celay a dmak to saki cangraan.

⁷ Pahapinangen Ningra ci Mosi to nisahalakaan Ningra, saka, ma'araw no Israil a tamdaw ko tadamaanay a dmak Ningra.

⁸ O matomesay no sini'ada ato mikomi ko Tapang, o caay ka narikay a makter Cingra, o matomesay ko olah Ningra.

⁹ Caay ka halafin ko kapo'i Ningra, caay pitafo Cingra a tahada'oc to kter.

¹⁰ Caay pido^do Cingra to raraw ita a mitfoc i titaanan, caay ko nano patlac ita ko sapico'ay Ningra i titaanan.

¹¹ Ano hakowaay ko takaraw no kakarayan a miliyas to sra i, hatiraay ko kakahad no sini'ada Ningra to mangodoay i Cingraan.

¹² Ano hakowaay ko kararaay no kawali ato ka^tip i, hatiraay ko pipaliyas Ningra to raraw ita i titaanan.

¹³ Ano masamaanay ko nika olah no wama to wawa ningra i, hatiraay ko nika olah no Tapang to mangodoay i Cingraan.

¹⁴ Mafana' Cingra to tireng ita, maharateng Ningra ko nika o nano sra kita.

¹⁵ Matiya o lahad no talod ko 'orip ita, matiya o lahad no hana no pala ko 'orip ita.

¹⁶ Fiyok han no fali i, lahdaw sato, awaayto a ma'araw no tamdaw cinira.

¹⁷ Nikawrira, mida'oc ko nika olah no Tapang to mangodoay i Cingraan, mararid ko mo^cel Ningra tangasa i kasarayray no hkal.

¹⁸ Mido^do Cingra to katatlekan Ningra i so'linay a mido^do to limo'ot Ningra a tamdaw.

¹⁹ Patirengen no Tapang i kakarayan ko tadamaanay a kamaro'an Ningra, malahongti Cingra a mikowan to kalomaamaan.

²⁰ Kamo o ki^melay ci'icelay a coyoh, o mihaklongay to limo'ot Ningra, o mido^doay to nafaloco'an Ningra a coyoh, pipahmek kamo a ma^min to Tapang.

²¹ Kamo o cisakowanay i kakarayan a ma^min, o maolahay a mido^do to nafaloco'an Ningra a tapatapang, pipahmek kamo a ma^min to Tapang.

²² Kamo o polong no masanga'ay Ningra a maamaan, pipahmek to Tapang. Kaitira i makowanay Ningra a kasaco'eco'ed a pahmek i Cingraan. 'Adingoaw ako, pipahmek to Tapang.