Loma 7 - 阿美語聖經-新約附詩篇箴言

O Tinako to no Mararamoday

¹ Salikakaaw, mafana' kamo to pakayniay i Rikec. Saka, mafana' kamo to tatodong no sasowalen ako. Yo ma'oripho ko tamdaw itiya a mapalit no Rikec cingra.

² Tinako sa, ano cifa'inay ko fafahiyan i, mapalit no rikec no mararamoday cingra yo ma'oripho ko fa'inay ningra. Caay ko laliyasen ningra ko fa'inay ningra. Ano mapatayto ko fa'inay ningra i, caayto ka palit no rikec no mararamoday cingra.

³ Orasaka, yo ma'oripho ko fa'inay ningra, ano ciramod cingra to roma a fa'inayan i, o ma'odangay han cingra. Nikawrira, ano mapatayto ko fa'inay ningra i, matdalto cingra nai rikec no mararamoday. Saka, ano ciramod cingra to roma a fa'inayan i, caay ko ma'odangay cingra.

⁴ Salikakaaw ako, matiya onini kamo. O mapatayayto kamo to pakayniay i no Rikecan a dmak. Nawhani o ccayto no tireng ni Kristo kamo. Saka, o no Ningrato kamo. O lomowaday a ma'orip nai patay a Tapang Cingra. Onini i, o sakanga'ay ita a matayal to no Kawas.

⁵ Yo mido^doho kita to matlangay a pinangan ita i, o nipaflian no Kawas ci Mosian a Rikec ko palowaday to sakaciraraw ita. Matayal konini i tireng ita to sakapatay ita.

⁶ Nikawrira, tona matiyato o mapatayay kita to pakayniay i mipalitay titaanan a no Rikecan a dmak saka, caayto ka palit no Rikec kita. Caayto ko no iti:yaayho a lkakawa no nitilidan a Rikec ko pi'arawan ita a mitoor to Kawas. O Fangcalay 'Adingo ko pi'arawan ita a mitoor to Kawas anini.

O Rikec ato Raraw

⁷ Ano hatira i, o moraraway ko Rikec haw? Caay! Ano awaay ko Rikec i, caay ka fana' kako to nika o maan ko raraw. <> ano caay ka saan ko Rikec i, caay ko mamafana' kako to nika o maan ko 'anof.

⁸ Pakayni i nika fana' ako to limo'ot no Kawas ko sakatalahkal no raraw a palowad to sakaci'anof ako to masamaamaanay. Ano awaay ko Rikec i, kona caay ka palowad ko raraw i faloco' ako.

⁹ I sapapotalay no Rikec kako a ma'orip i ti:yaho. Ikor sato, yo irato ko limo'ot no Rikec i, marafraf ko sakaciraraw ako. O hci nonini a raraw ako i,

¹⁰ o patay ako. O sakaci'orip ako ko Rikec nasa kako. 'Arawhani, o sakapastek ako i patay aca konini.

¹¹ Pakaynien no raraw i limo'ot ko sapisa'fit i takowanan a mipatay.

¹² Ano haratengen i, fangcalay ko Rikec ni Mosi hananay. Saka, o fangcalay, o malalenay, o nga'ayay ko matiliday a sowal i Rikec.

¹³ Ano hatira i, malasakapatay ako ko nga'ayay hakiya? Caay! O raraw ko mipatayay i takowanan. Pakaynien no raraw i nga'ayay ko pipatay i takowanan. Ta mahapinangto ita ko nika masamaanay ko raraw hananay. Saka, pakayni i limo'ot a mapahapinang ko nika hakowa ko nika tatiih no raraw.

O Nika Lalood no Faloco' no Tamdaw

¹⁴ Mafana' kita, o saki 'adingoan ita ko Rikec ni Mosi. Nikawrira, tona o tamdaw kako saka, mapacakay kako a malakoli no raraw.

¹⁵ Caay ka fana' kako to tatodong no nidmakan ako. Nawhani o kangalayan ako i, caay pidmak kako. O ka'osian ako a tatiihay a dmak i, midmak kako.

¹⁶ Tona caay ko kangalayan ako ko nidmakan ako saka, o pahapinangay kako to nika o nga'ayay ko Rikec.

¹⁷ Orasaka, o midmakay tonini i, caay ka o kako, oya iraay i takowanan a raraw ko midmakay.

¹⁸ Mafana' kako i laloma' no tireng ako i, awaay ko nga'ayay. Nawhani sapidmakan kako to nga'ayay. Nikawrira, awaay ko 'icel ako a milahci tonini.

¹⁹ O kangalayan ako a nga'ayay i, caay pidmak kako. O ka'osian ako a tatiihay i, dmaken ako.

²⁰ Ano caay ko kangalayan ako ko nidmakan ako i, caay ka o kako ko midmakay tonini. Oya iraay i takowanan a raraw ko midmakay.

²¹ Orasaka, mahapinang ako ko ccay a lkakawa, yo sapidmakan kako to nga'ayay i, mahapinang ako ko nika ira i faloco' ako ko tatiihay a pinangan a paci^ci to tatiihay a dmak.

²² Maolah ko faloco' ako a miharateng to Rikec no Kawas.

²³ Nikawrira, mapakatayal no roma a lkakawa ko tireng ako, o mipacoliay to kaolahan no faloco' ako a nga'ayay a dmak, mipalit i takowanan konini a papitoor to pinangan no raraw. Onini a lkakawa ko mingiyangiay to tireng ako.

²⁴ Aya: kako o tadancaay a tamdaw! Acima asa ko papa'orip i takowanan a paliyas nai mipatayay takowanan a pinangan ako hakini?

²⁵ O kakansiyaen ako ko Kawas! Nawhani pakaynien Ningra i Tapang ita ci Yis Kristoan ko nipipa'orip i takowanan! Mahaenay saka, o faloco' aca ako ko sapido^doananay to Rikec no Kawas. Nikawrira, o koliho no raraw ko tireng ako.