Loma 2 - 阿美語聖經-新約附詩篇箴言

O Pisawkit no Kawas

¹ Salikakaaw, ano misatatiih kiso to tao, ano o cimato kiso i, awaay ko pakayraan iso a pa'ading to tireng. Tona misatatiih kiso to tao saka, o malcaday to midmakay kiso to raraw. Nawhani o mipastekay i raraw to tireng ko misatatiihay to tamdaw.

² Saka, mafana' kita to nika o so'linay ko dmak no Kawas a misawkit to midmakay to matiniay a raraw.

³ Salikakaaw, kiso o misatatiihay to matiniay a raraw no tao i, o midmakay kiso to matiniay a raraw. Saka, <>, sa kiso saw?

⁴ Latek o misakahmaway ko harateng iso to sini'ada ato nika kodait ato nipihadidi no Kawas. Caay ka fana' kiso saw to nika o sini'adaay ko Kawas a mangalay a mikrid tisowanan a papifalic to faloco' iso.

⁵ 'Arawhani, 'atkak, caay ka falic ko faloco' iso. Saka, kiso ko mitongalay to sakakarteng no nika sawkit iso i pipatalahkalan no Kawas to kter ato mo^celay a pisawkit Ningra.

⁶ Nawhani o nano nidmakan no kahaccaccay a tamdaw ko pi'arawan no Kawas a pafli to tatodong noya tamdaw.

⁷ O romaroma a tamdaw i, misa'icel to nga'ayay a dmak. Milongoc cangra i Kawas to sakatadamaanaw ato sakaci'oripaw nangra to mida'ocay. O matiniay a tamdaw i, o mamapafli no Kawas cangra to mida'ocay a 'orip.

⁸ Nikawrira, o misatkeday, o caay pido^do to so'linay a sowal no Kawas, o paci^ci sanay a mitoor to caay ka mo^cel a tamdaw i, o kakteren no Kawas cangra.

⁹ O tatiihay a tamdaw a ma^min i, o mamapades a misemsem cangra. I 'ayaw ko Yutaya a tamdaw, ta ikor i, o romato a finacadan a mapasemsem.

¹⁰ Nikawrira, o nga'ayay ko dmak a tamdaw a ma^min i, o mamala tadamaanay, o cacirihaday cangra. I 'ayaw ko Yutaya a tamdaw, ta ikor i, o romato a finacadan a mapalmed.

¹¹ Nawhani caay pisakakinih ko Kawas.

¹² O awaay ko Rikec ni Mosi a roma a finacadan, ano mararaw cangra i, caay ka sawkit no Rikec a matkop. Ci Rikec ko Yutaya a tamdaw, saka ano mararaw i, mamasawkit no Rikec cangra.

¹³ Nawhani o sakanga'ay no tamdaw a malayap no Kawas a mo^celay, caay ko nano nitngilan nangra to Rikec, o nano nilahcian to Rikec ko sakapilayap no Kawas toya tamdaw.

¹⁴ O caay ka fana' to Rikec ni Mosi ko roma a finacadan. Nikawrira, ano ira i pinangan nangra ko lonok sanay a mido^do to matiliday i Rikec a sowal, ano caacaay ka cirikec cangra i, o niyah a tireng ko malorikec nangra.

¹⁵ O dmak nangra ko pahapinangay to nika ira i faloco' nangra ko limo'ot no Rikec. O romasato, o nga'ayay a faloco' nangra ko pawacayay tonini. Nawhani toro'en no nga'ayay a faloco' nangra ko moraraway a dmak nangra. Ano ^ca i, mipa'ading ko nga'ayay a faloco' nangra to dmak nangra.

¹⁶ Orasaka, o papatalahkalen no Kawas pakayni i ci Kristo Yisan i pisawkitan a romi'ad ko nisimedan no tamdamdaw a dmak. Mato sowal no nipatnakan ako a Nga'ayay Ratoh konini.

O Yutaya a Tamdaw ato Rikec

¹⁷ Ano hatira i, maan saan kiso saw? O Yutaya a tamdaw kako saan kiso a mitadi'ec to Rikec a mipasneng to nipitoor iso to Kawas.

¹⁸ Pakayni i Rikec ko sakafana' iso to nafaloco'an no Kawas. Saka, mafana' kiso a mihapinang to nga'ayay a dmak.

¹⁹ Tona o mafana'ay kako to Rikec a ma^min ato so'linay a dmak no Kawas saka, o mamikayat kako to mapohaway, o mamalalikat kako i to'manay,

²⁰ o mamipasifana' kako to mafokilay, o mamala singsi no ka^mangay kako saan ko nipaso'lin iso. Nawhani iraen to kiso to Rikec ni Mosi, saka mahawop iso ko fana' ato so'lin, saan ko harateng iso.

²¹ Mipasifana' kiso to tao. Nawiro caay pasifana'en iso ko tireng saw? Aka pitakaw saan kiso a patnak i tao i, a mitakaw kiso haw?

²² Aka ka 'odang saan kiso a pasowal i tao i, a ma'odang kiso haw? Ma'osi kiso to samiyay i, a mitakaw kiso to maamaan no pita'ongan saw?

²³ Pasneng kiso to nika fana' iso to Rikec no Kawas i, mipacoli kiso to Rikec a mipakangodo to Kawas haw?

²⁴ Mato nika tilid i Fangcalay Cudad, <> saan.

²⁵ Ano ma'imer kiso to Rikec i, ci^poc ko nipido^do iso to krit a lisin. Nikawrira, ano miliyang kiso to Rikec i, awaay ko ^poc no nipido^do iso to krit a lisin.

²⁶ Ano caacaay pido^do to krit a lisin ko roma a finacadan, ano ma'imer cangra to limo'ot no Rikec i, matiya o makritay cangra a nengnengen no Kawas.

²⁷ Ano cicudacudad kamo to no Rikec a mido^do to krit a lisin i, tona miliyang kamo to Rikec saka, o mamasawkit no roma a finacadan kamo to raraw namo o Yutaya a tamdaw.

²⁸ O sapa'araw aca ko dmak a Yutaya a tamdaw i, caay ko so'linay a Yutaya a tamdaw. Caay ko so'linay a krit koya ma'araway i tireng a krit.

²⁹ O so'linay a Yutaya a tamdaw i, o nai faloco'ay ko dmak. O nai faloco'ay a pitoor to Kawas ko so'linay a nika krit. Onini a nika krit i, o nano tayal no 'Adingo no Kawas. Caay ko nano matiliday i Rikec a dmak. O matiniay a tamdaw i, caay ko tamdaw ko mahmekay. O Kawas ko mahmekay cingraan.