Loma 14 - 阿美語聖經-新約附詩篇箴言

Aka Pilikaf to Tamdamdaw

¹ Pihamham kamo a pacomod to tadancaayho ko piti'er i ci Kristoan a tamdaw. Aka ka laliyang ato cingra to niharatengan ningra.

² O roma a tamdaw i, paso'lin to nika nga'ay a komaen to maamaan. Nikawrira, o tadancaay a tamdaw i, o dateng a ccay ko kaenen ningra.

³ O komaenay to kalokakaenen i, aka piples to caay ka komaen a tamdaw. O dateng aca ko nikaenan a tamdaw i, aka pilikaf toya komaenay to maamaan a tamdaw. Nawhani o nihamhamanto no Kawas cingra.

⁴ O masamaanay a tamdaw kiso saw iro milokes kiso to matayalay no tao? O tawki ningra ko citodongay a miharateng to nika lahci ato nika ^ca ka lahci no tayal ningra. O mamalahci ko tayal ningra. Nawhani ma^deng ko Tapang a palowad cingraan.

⁵ Ikaka norira a romi'ad konini a romi'ad saan ko harateng no roma a tamdaw. O roma a tamdaw i, malcaday a ma^min ko romi'ad saan ko harateng. O nipihapinang no paytmek a misafaloco' ko nga'ay.

⁶ Tinako sa, o ma'imeray to ccay a romi'ad i, o ccay no pipahmek ningra to Tapang ko nika 'imer ningra toya romi'ad. O komaenay to kalokakaenen i, o ccay no pipahmek ningra to Tapang ko nika komaen ningra. Nawhani o miahowidayto cingra i Kawas. O caay ka komaen to kalokakaenen i, o ccay no pipahmek ningra to Tapang ko nika ^ca ka komaen ningra. O mikansiyaay cingra to Kawas.

⁷ Awaay ko ccaccay aca a tamdaw to satked sanay to 'orip ano ^ca i, to patay.

⁸ O sapalipahak to Tapang ko nika 'orip ita ato nika patay ita. Orasaka, ano nika 'oripto, ano nika patayto ita i, o no Tapangto kita.

⁹ Nawhani o sakapatay ato sakalomowad ni Kristo a ma'orip nai patay i, o maloTapang no mapatayay ato ma'oripay.

¹⁰ Ano hatira, kiso i, nawiro milikaf kiso to salikaka saw? Nawiro miples kiso to salikaka saw? O tatomireng kita a ma^min i ka'ayaw no Kawas a masawkit.

¹¹ Mato sowal a matilid i Fangcalay Cudad, <> saan.

¹² Orasaka, o papatalahkal ko kahaccaccay ita a pasowal i Kawas to nano dmak no tireng.

Aka Patahfikoden i Piti'er ko Salikaka

¹³ Orasaka, akato kasasilikaf. Ka o nipihapinang to faloco' ko nga'ay to saka^caaw patahfikod i piti'er no salikaka a pakaciraraw.

¹⁴ Malaccay kako ato Tapang ci Yis saka, tanektek ko paso'lin ako to nika awaay ko ccaccay aca a kapaysinan a kakaenen. Deng o kapaysinan konini ano saan ko tamdaw i, paysin cingra a komaen tonini.

¹⁵ Ano pakayniay i kakomaen iso to maan ko sapakasmer iso to salikaka iso i, o caayay ko nano olah ko dmak iso. Aka ka o pakayniay i kakomaen iso to maan ko pitfad iso to salikaka. Nawhani o saki cingraan ko nika patay ni Kristo.

¹⁶ Aka ka likaf no tao koya nga'ayay a dmak hananay namo.

¹⁷ Nawhani o mo^celay ato parihadayay ato lipahak ko nano Fangcalay 'Adingo ko pikowan no Kawas, caay ko pakayniay i kakaenen ko pikowan Ningra.

¹⁸ Ano mahaen ko nika tayal no tamdaw i ci Kristoan i, o kaolahan no Kawas, malakahmekan no tamdamdaw cingra.

¹⁹ Tona mahaen saka, longocaw ita ko sakararihaday ato sakasasipa'icel to faloco' a dmak.

²⁰ Aka ka o kakaenen ko sapipalasawad to tayal no Kawas. O nga'ayay ko kakaenen a ma^min. Nikawrira, ano o sakatahfikod i piti'er no tamdaw a ciraraw ko nika komaen iso i, o tatiihay.

²¹ O caay ka komaen to titi ato ^pah ato caay patahfikod to salikaka a romaroma a dmak i, o nga'ayay.

²² Ano maan saan ko nihapinangan iso a paso'lin i, o no miso ato Kawas a dmak konini. O caay ka hinapec ko faloco' to nihapinangan no tireng a nga'ayay a dmak i, o malmeday.

²³ Nikawrira, ano cihinapec ko tamdaw a komaen i, malasakaciraraw ningra, nawhani caay ko nano piti'er ko dmak ningra. O caay ko nano piti'er ci Kristoan a dmak i, o raraw a ma^min.