Kolosay 4 - 阿美語聖經-新約附詩篇箴言

¹ Kamo o malatapangay i, ka o mo^celay ato malalenay ko dmak namo to saki koli. Aka kafokil, halo amo a ira i kakarayan ko Tapang.

O Sapalimo'ot a Sowal

² Kararid a mitolon. Yo mitolon kamo i, kapalal ko faloco' namo a mikansiya i Kawas.

³ O romasato, pitolon to saki tamiyanan to sakapifawahaw no Kawas to malopakayraan niyam a patnak to sowal Ningra a pasowal to pakayniay i ci Kristoan a pakakmoday a dmak. Onini a tayal ko sakarofo ako i matini.

⁴ Saka, damaen kako a mitolon, ta cisikining kako a nipasowal to pakakmoday a mipahapinang.

⁵ Kacitaneng kamo to malodadmaken namo to saki caay pitoor to Kawas a tamdaw, kalimlaen ko kanga'ayan namo a romi'ad.

⁶ Kararid a damsay ato o kaolahan no tamdaw a mitngil ko sowal namo. Matiya o nipacilahan a kakaenen. Kafana' kamo to nika samaanen ko pipaca'of to licay no kahaccaccay a tamdaw.

O Sapaikor a Sowal

⁷ O dmak ako i tini a ma^min i, ci Tikikus o so'linay ko faloco' a matayalay to no Tapang a kapot ako a malakoli a kaolahan a salikaka ko misahciay a pakafana' i tamowanan.

⁸ Onini ko sacidek ako a miocor i cingraan a patayra i tamowanan to sakafana'aw namo tono i tiniay a dmak niyam, ta mapa'icel ko faloco' namo.

⁹ Pahaklongen ako i cingraan ko so'linay ko faloco' a kaolahan ita a salikaka ci Onisimus. O namo a tamdaw cingra. Onini a tatosa ko papakafana' i tamowanan to dmak niyam o i tiniay.

¹⁰ Nga'ayho saan i tamowanan ko kapot ako a marofo ci Aristarkus ato sasalikakaen ni Parnapas ci Maroko. (Pakayniay ci Marokoan i, mahrekto kako a palimo'ot i tamowanan. Ano tayra cingra i tamowanan i, hamhamen cingra han ako kamo.)

¹¹ Ci Yustus hananay a tamdaw ci Yisu ko roma a nga'ayho saan i tamowanan. Deng onini a tatolo a Yutaya a tamdaw ko mikapotay takowanan a matayal to saki Kitakit no Kawas, tadamaan ko pipadama nangra i takowanan.

¹² Nga'ayho saan i tamowanan ko namo a tamdaw ci Ipafras, o koli ni Yis Kristo. Mararid cingra a misa'icel a mitolon to saki tamowanan. Milongoc cingra i Kawas to sakatanektekaw no faloco' namo a mato'as ato sakasongila'aw no faloco' namo a mitoor to nafaloco'an no Kawas a ma^min.

¹³ Pawacay kako to pakayniay i cingraan to nika o marorayay cingra a matayal to saki tamowanan ato i Laotikiyaay ato i Hirapolisay a tamdamdaw.

¹⁴ Nga'ayho saan i tamowanan ci Luka o kaolahan ita a ising aci Timas.

¹⁵ Nga'ayho han a paratoh ko i Laotikiyaay a salikaka ato kiwkay i loma' ni Nimfa.

¹⁶ Ano mapatngilto a maasip i tamowanan konini a tilid ako i, patayraen i Laotikiya a kiwkay a papipatngil a miasip. O romasato, haenen a miasip i tamowanan ko nai Laotikiyaay a sapatilid ako i cangraan.

¹⁷ Pasowal hanto ci Arkipus, <> han.

¹⁸ O mitiliday tonini a salicay i, kako ci Pawlo. <> Haratengen ko nika palit ako i pirofoan! Nanay, mapaini no Kawas kamo to mikomi.