Kolosay 1 - 阿美語聖經-新約附詩篇箴言

¹ Ci Pawlo kako, o nano nafaloco'an no Kawas a malatarokosay ni Kristo Yis kako ato salikaka ci Timoti

² patilid i tamowanan o i Kolosayay a so'linay ko faloco' a mitooray ci Kristoan a salikaka. Nanay, mapaini no Wama a Kawas ita kamo to mikomi ato rihaday!

O Mikansiyaay a Pitolon

³ Yo mitolon to saki tamowanan i, mararid kami a mikansiya to Kawas, oya Wama no Tapang ita ci Yis Kristo.

⁴ Nawhani matngil niyam ko pakayniay i nipiti'er namo i ci Kristo Yisan ato nika olah namo to polong no mitooray.

⁵ Yo mapatnak i tamowanan i sa'ayaw ko Nga'ayay Ratoh to pakayniay i sowal no Kawas i, mahapinangto namo i Nga'ayay Ratoh ko malopafaloco'an namo. Ira i kakarayan konini. Onini a pafaloco'an ko sakapiti'er namo ato sakaciolah namo.

⁶ Matnak a matnak i polong no hkal konini a Nga'ayay Ratoh a lomahad a cihci i faloco' no mitngilay, mahaenay kamo, namitngil kamo to pakayniay i mikomi no Kawas i, mahapinangto namo ko nika so'lin nonini a tahanini, saka, malahad i tamowanan konini a Nga'ayay Ratoh a cihci.

⁷ Ci Ipafras o kaolahan niyam a kapot, o so'linay ko faloco' a matayalay ni Kristo to saki titaanan ko sakafana' namo to sini'ada no Kawas.

⁸ Cingra ko pakafana'ay i tamiyanan to nika o nano Fangcalay 'Adingo ko sakaciolah namo.

⁹ Orasaka, namatngil niyam ko pakayniay i tamowanan a dmak i, mararid kami a mitolon to saki tamowanan, nanay mapafli no Kawas kamo to nano Fangcalay 'Adingo a masamaamaanay a taneng ato sakafana', ta ma^deng a mihapinang to nafaloco'an Ningra.

¹⁰ Ta mado^do namo ko matatodongay i nafaloco'an no Tapang a dmak a mararid a palipahak i Cingraan. Ta nga'ay ko dmak namo a ma^min. Ta matongal a matongal ko nika fana' namo to Kawas.

¹¹ Nanay pakayni i ma'dilay a 'icel no Kawas ko sakaci'icel, mapa'icel kamo to masamaamaanay a 'icel, ta ma^deng kamo a kodait a mihadidi to pades a ma^min. Ka o lipahakay a faloco' ko

¹² sapikansiya namo to Wama a Kawas, nawhani paroceken no Wama a Kawas kamo to sakanga'ay a mikapot to mitooray itira i ta^ngaday a sakowan a milayap to nitrekan Ningra a dafong.

¹³ Pa'oripen no Kawas kita a paliyas nai 'icel no to'manay a milinah a patayra i nikowanan no kakaolahan Ningra a Wawa.

¹⁴ Pakayni tonini a kaolahan Ningra a Wawa ko sakatdal ita a mapakonira ato sakahpol no raraw ita.

O Pinangan ato Tayal ni Kristo

¹⁵ Ci Kristo ko faco no caay ka 'araw a Kawas. O i kakaay no masanga'ay a maamaan Cingra.

¹⁶ Nawhani pakayni i Cingraan ko nipisanga' no Kawas to maamaan. Ano i kakarayanayto, ano i hkalayto, ano o ma'arawayto, ano o caayto ka 'araw a ma'oripay a maamaan halotapatapang ato mikowanay ato cisakowanay a kawakawas i, pakayni i Cingraan ko nipisanga' no Kawas tonini a ma^min. O romasato, o saki Cingraan ko nipisanga' no Kawas tonini.

¹⁷ I 'ayaw no nika ira no maamaan a ira ci Kristo. Cingra ko sakatlek no maamaan.

¹⁸ O fongoh no tatirengan Cingra, o Tapang no kiwkay. O tatapangan no fa^lohay a 'orip Cingra. O fisac a Wawa Cingra. O sa'ayaway a lomowad a ma'orip nai patay Cingra, onini ko saka malasakakaay Cingra i polong no maamaan.

¹⁹ O nafaloco'an no Kawas saka, pafli han Ningra i Wawa Ningra ko polong no masongila'ay a pinangan Ningra.

²⁰ Saka, pakayni i Wawa, nikton to faloco' ko Kawas a palali'ay i Cingraan to tahaf no kakarayan. Pakaynien no Kawas i nikapatay no Wawa i ciwcika a milahci to sakararihaday, ta miliyaw haca a mapalano Ningra to kakarayan ato hkal a ma^min.

²¹ I ti:yaho i, maliyasay namo ko Kawas. O tatiihay a dmak ato harateng namo ko sapisa'ada namo to Kawas.

²² Nikawrira, anini sato i, pakaynien no Kawas i nika patay no cihciay a tireng no Wawa Ningra, ta palali'ayen no Kawas Cingra ato kamo a malawidang, onini i, o sakakoracaw namo i ka'ayaw Ningra, ta awaay ko tatoro'en a raraw namo a masongila'.

²³ Orasaka, satanekteken ko nipiti'er namo a pararid a mitoor. Yo mitngil kamo to Nga'ayay Ratoh i ti:yaho i, irato ko pafaloco'an namo. Aka sawaden konini. Mapatnakto anini konini a Nga'ayay Ratoh i polong no tamdamdaw. Kako ci Pawlo ko matayalay a patnak tonini.

O Tayal ni Pawlo

²⁴ Orasaka, lipahak kako anini a mapades to saki tamowanan. Onini a tireng ako ko sapipadang ako to lalahcien ni Kristo a pades to saki tireng Ningra a kiwkay.

²⁵ O Kawas ko pakatayalay takowanan to sakalakoli no kiwkay, Cingra ko pafliay i takowanan tonini a tayal to sakaci^poc namo. O sasongila'en ako a mipatnak konini a sowal no Kawas,

²⁶ caay patalahkalen no Kawas i tamdaw i ti:yaho ko pakakmoday a dmak Ningra. Nikawrira, anini sa i, mapatalahkalto no Kawas i finawlan Ningra ko pakakmoday a dmak.

²⁷ O nisahalakaan no Kawas i, o pipakafana' i finawlan Ningra to pakakmoday a dmak. Onini a pakakmoday a dmak hananay i, o nika maro' ni Kristo i faloco' namo. Ta pakayni tonini ko sakanga'ay namo a mikapot to Kawas i nika tadamaan Ningra. O saki kasafinacadan no hkal konini a tadamaanay, ci'dilay a pakakmoday a dmak.

²⁸ Saka, mipatnak kami i kahaccaccay a tamdaw to pakayniay ci Kristoan. Pakaynien niyam i taneng ko pipalimo'ot a pasifana' cangraan. Ta pakayni i nika laccay noya tamdaw aci Kristo a mato'as ko faloco' ningra ta makrid niyam cingra a patangasa i ka'ayaw no Kawas.

²⁹ Tona sapilahciaw tonini a patosokan, saka pakaynien ako to nipaflian ni Kristo a tadamaanay a 'icel a caay ka rorayen a misa'icel a matayal.