Kalatiya 6 - 阿美語聖經-新約附詩篇箴言

Kasasi'orong to 'Inorong

¹ Salikakaaw, ano mapalita namo ko nika ciraraw no nima i, kamo o makriday no Fangcalay 'Adingo, ka o damsayay a faloco' ko sapisalof to matiraay a tamdaw. Hapinangen a mina'on ko tireng to saka^caaw ka sawi.

² Kasasi'oro'orong kamo to 'inorong namo. Haenen ko pido^do namo to Rikec ni Kristo.

³ Ano caay ko tadamaanay a tamdaw, o tadamaanay kako ano saan ko cima i, o misafana'ay cingra to tireng.

⁴ O nipipaytmekho a mihapinang to dmak no tireng ko nga'ay. Ta ano o nga'ayay ko dmak ningra i, o sakalata'ang noya tamdaw konini. Nikawrira, aka pipasasotiri' to no tao.

⁵ Nawhani o a'orongen no paytmek ko no tireng a 'inorong.

⁶ O mapasifana'ay to mo^celay a lalan ni Kristo a tamdaw i, o papalada'en ningra ko singsi ningra to iraay i cingraan a nga'ayay a maamaan.

⁷ Aka ka moraraw ko harateng namo. Caay ko sasamsamen ko Kawas. Ano o maan ko nipalomaan no tamdaw i, orira ko lalitoden ningra.

⁸ Ano o nipido^do to 'anof no tireng ko nipalomaan no tamdaw i, nai 'anof no tireng a miala koya tamdaw to sakapatay ningra. Nikawrira, ano o pido^do to Fangcalay 'Adingo ko nipalomaan no tamdaw i, nai Fangcalay 'Adingo a miala koya tamdaw to mida'ocay a 'orip.

⁹ Saka, aka ka rarima kita to nga'ayay a dmak. Ano caay ka toled kita, ano maraodto ko romi'ad i, o mamalayap ita ko tatodong no nga'ayay a dmak ita.

¹⁰ Orasaka, ano hacowato a romi'ad, ano ira ko kanga'ayan i, o nika rarid ita a midmak to sakalmed no tamdamdaw ko nga'ay. Ikakaen ita ko pihaen to paro no loma' no mitooray ci Kristoan.

O Sapaikor a Limo'ot

¹¹ Nengnengen, matini ko nika tata'ang no tilid ako a patilid i tamowanan.

¹² O paci^ciay i tamowanan a papido^do to krit a lisin i, o sapa'araw aca nangra to nika lalok nangra. O sakapihaen nangra i, o saka^caaw ka kari'ang nangra pakayni i ciwcika ni Kristo.

¹³ Ano so'linen haw i, halo cangra o makritay a tamdaw a caay pido^do to Rikec. O sapapikrit nangra i tamowanan i, o sapasnengaw nangra to pakayniay i tireng namo.

¹⁴ Nikawrira, o no mako i, deng o ciwcika no Tapang ita ci Yis Kristo ko malopapasnengen ako. Nawhani pakayni tonini a ciwcika, o no hkalan i, o mapacekayto kako i ciwcika, ano kako to i, mapacekayto ko hkal i ciwcika.

¹⁵ Caay ko kakalimlaan ko nika krit ato nika ^ca ka krit. O kakalimlaan i, deng o nika malafa^lohayto a tamdaw kita.

¹⁶ O mitooray a tamdamdaw tonini a limo'ot i, nanay mararid a mahapinang nangra ato finawlan no Kawas a ma^min ko rihaday ato adayay no Kawas.

¹⁷ I ikor nonini i, akato pakaroray ko cimacima namo i takowanan. Nawhani ira i tireng ako ko pi'dac no doka' to kacipinangan to nika o koli ni Yis kako.

¹⁸ Salikakaaw, nanay, mapaini no Tapang a Yis Kristo ita kamo a mapolong to mikomi! Amin.