Kalatiya 1 - 阿美語聖經-新約附詩篇箴言

¹ O tarokos kako ci Pawlo. O sakalatarokos ako i, caay ko nipatirengan no tamdaw. Caay ko niocoran no tamdaw. Ci Yis Kristo ato palowaday Cingraan a pa'orip nai patay a Wama a Kawas ko mipatirengay takowanan.

² Nga'ayho han ako ato i tiniay a salikaka kamo o i Kalatiyaay a kalokiwkay.

³ Nanay, mapaini no Wama a Kawas ita ato Tapang ci Yis Kristo kamo to mikomi ato rihaday!

⁴ O sapa'oripaw ni Kristo a paliyas titaanan nai aniniay a tatiihay a hkal saka, do^do han Ningra ko nafaloco'an no Wama ita a Kawas a kinafalah to tireng to sakahpol no raraw ita.

⁵ Nanay, mapa'dil ko Kawas, caay ka citolas! Amin.

Awaay ko Roma a Nga'ayay Ratoh

⁶ O nano mikomi ni Kristo ko sakatahidang namo a mitoor Cingraan, safahka' sa kako to nika hatini namo a ranikay a miliyas ci Kristoan a pasayra i roma a ratoh.

⁷ Awaay ko roma a Nga'ayay Ratoh. Nikawrira, ira ko mirawraway tamowanan a sapifalican to Nga'ayay Ratoh to pakayniay ci Kristoan.

⁸ Nikawrira, ano kamito ano nai kakarayanayto a coyoh i, ano pacoliay to nipatnakan niyam a Nga'ayay Ratoh ko nipatnakan ningra i, mamana ma'kak cingra.

⁹ Liyawen ako a somowal kamo toya nisowalan niyam i 'ayaw. Ano ira ko mipatnakay i tamowanan to pacoliay to nilayapan namo a Nga'ayay Ratoh i, mamana ma'kak cingra.

¹⁰ O sakasaan ako i, nga'ay kahmeken no tamdaw kako o sanay ako saw? Ano ^ca i, nga'ay kahmeken no Kawas kako o sanay ako saw? O sapisolotaw ako to faloco' no tamdaw saw? Caay! Ano o sapisolotaw ako to faloco' no tamdaw ko dmak ako i, caay ko koli ni Kristo kako.

Mapalatarokos ci Pawlo

¹¹ Salikakaaw, pakafana'en ako kamo. Oya nipatnakan ako a Nga'ayay Ratoh i, caay ko nano tamdawan.

¹² Caay ko nipatorodan no tamdaw i takowanan konini. Caay ko nipasifana'an no tamdaw kako. Ci Yis Kristo ko pahapinangay a pa'araw i takowanan tonini a Nga'ayay Ratoh.

¹³ Matngilto namo ko nano dmak ako a mitoor to pakayraan no Yutaya ato nika codah ako a mikari'ang to kiwkay no Kawas to sapipalasawadaw.

¹⁴ Ikaka no 'alomanay a finacadan a slal ako ko lalok ako a mitoor to no Yutaya a pakayraan ato pisa'icel ako a ma'imer to lkakawa no tato'asan ita.

¹⁵ Nikawrira, o nano mikomi no Kawas, saka, yo itiyadho no ina kako i, pili'en Ningra kako a palacidek to mamalomamatayal Ningra.

¹⁶ Yo maraodto ko pipahapinangan Ningra to Wawa Ningra i takowanan to sapiocoraw Ningra i takowanan a papipatnak to pakayniay ci Kristoan a Nga'ayay Ratoh i roma a finacadan i, caay pilicay kako i cimacimaan to malodadmaken ako.

¹⁷ O romasato, caay ka tayra kako i Yirusalim a minengneng cangraan o i 'ayaway ako a malatarokos. Tangsol sa kako a tayra i Arapiya. Ta patiko kako a minokay i Tamaskus.

¹⁸ Nanoya, i ikor no tolo a mihcaan i, tayra kako i Yirusalim to sapiliso'aw ci Pitiroan. Itira kako i cingraan a milafin to lima ko safaw a romi'ad.

¹⁹ Awaay a ma'araw ako ko romaroma a tarokos. Deng o salikaka no Tapang ci Yakop ko ma'araway ako itiya.

²⁰ I ka'ayaw no Kawas kako a somowal to nika caay ko mangah konini a sowal ako!

²¹ Nanoya, tayra sato kako i Siriya ato Kilikiya a pala.

²² Nikawrira, caho ka fana' i takowanan ko kalokiwkay itira i Yutaya.

²³ O matngilay nangra i, <> sanay a sowal.

²⁴ Saka, hmek sato cangra to Kawas to nano dmak ako.