Ifiso 3 - 阿美語聖經-新約附詩篇箴言

O Pipatnak ni Pawlo i Roma a Finacadan

¹ Orasaka, kako ci Pawlo o marofoay to saki ci Kristo Yisan ato saki tamowanan o roma a finacadan i, mitolon kako to Kawas.

² Mafana'ay kamo, paini ko Kawas to mikomi, saka mapatorod kako to ccay a tayal to sakanga'ay namo.

³ Mapahapinangto no Kawas kako a pakafana' to pakakmoday a dmak Ningra. (Mapasamoayto ako a mitilid tonini a pakakmoday a dmak,

⁴ ano maasip namo korira i, o mamafana' kamo to o maan ko nipakafana'an no Kawas i takowanan to pakayniay i ci Kristoan a pakakmoday a dmak.)

⁵ I tiyaho i, caay pahapinangen no Kawas i cimacimaan konini a pakakmoday a dmak. Anini sato i, pakaynien Ningra i Fangcalay 'Adingo ko nipipahapinang tonini i fangcalay a tarokos ato pali'ayaway to sowal Ningra.

⁶ O tatodong nonini a pakakmoday a dmak i, pakayni i Nga'ayay Ratoh a mapalakapot ko roma a finacadan ato Yutaya a tamdaw a mapalmed no Kawas. O ca'angto no ccay a tireng cangra. O romasato, malcad cangra a milayap to niktonan no Kawas a sowal pakayni ci Kristo Yisan a malahci.

⁷ O nano micidekay a rocek no Kawas ko saka malakoli kako to no Nga'ayay Ratoh, onini i pakaynien Ningra i dmak no tadamaanay a 'icel ko pipafli i takowanan.

⁸ Talacowa o sasafaay no polong no mitooray kako, nikawrira, mapalmed no Kawas kako. Saka, micidek ko nipipafli Ningra i takowanan to tayal. Onini i, o sapipatnakaw ako i roma a finacadan to caay ko mama^min a sowalen a tadamaanay a dmak ni Kristo.

⁹ O romasato, o sapipahapinangaw ako i tamdamdaw to nika o mamasamaan ko nika lahci no pakakmoday a nisahalakaan no Kawas a dmak. Naniti:yaho a masimed no misanga'ay to maamaan a Kawas konini a pakakmoday a dmak.

¹⁰ O sakapisimed no Kawas tonini i, nga'ay pakayni i kiwkay a mapatiri' anini ko i kakarayanay a mikowanay a coyocoyoh ato cisakowanay to kasasiromaroma no taneng no Kawas.

¹¹ O sakapihaen no Kawas i, o sapido^doaw Ningra to caay ko mamafalic a nafaloco'an Ningra. Malahcito Ningra konini i tireng no Tapang ita ci Yis Kristoan.

¹² Pakayni i piti'er ita i ci Kristoan ko sakatanektek no faloco' ita a caay paska a miraod i ka'ayaw no Kawas.

¹³ Orasaka, nanay caay ka toled ko faloco' namo to nika pades ako to saki tamowanan. O sakaci^poc namo konini a ma^min.

O Olah ni Kristo

¹⁴ Orasaka, mipitosor kako a mitolon i ci Wamaan.

¹⁵ Nawhani Cingra ko tatapangan no i kakarayanay ato i hkalay a kasafinacadan.

¹⁶ Nanay o nano nika tadamaan no 'dil Ningra ato 'icel no Fangcalay 'Adingo ko sakaki^mel no faloco' namo.

¹⁷ Nanay pakayni i piti'er namo ko sakamaro' ni Kristo i faloco' namo. Nanay o olah Ningra ko palamitan ato katanektekan no faloco' namo.

¹⁸ Ta malcad kamo ato polong no finawlan no Kawas a ma^deng a mihapinang to nika hakowa ko kakahad, kakaya', takaraw ato talolong no olah ni Kristo.

¹⁹ Nanay mafana' kamo to olah ni Kristo, oya mikikakaay to taneng ato fana' no tamdaw a olah, ta matomes no tadamaan no Kawas kamo.

²⁰ Pakayni i matayalay i titaanan a 'icel no Kawas ko nika ma^deng a malahci Ningra ko ikakaay no nilongocan ato niharatengan ita a maamaan a dmak.

²¹ Nanay pakayni i ci Yis Kristoan ato kiwkay a mapahmek ko Kawas awaay ko tolas a tahada'oc! Amin.